32-shi qysqy Ýnıversıada oıyndarynda Qazaqstan quramasy sapynan sporttyń 10 túrinen 103 sportshy qatysty. Qańtardyń 13-i men 23-i aralyǵynda ótken dúbirli dodada el quramasy 14 medal ıelendi. Júlde sany boıynsha bul Qazaqstannyń Ýnıversıada tarıhyndaǵy ekinshi úzdik nátıjesi. Buǵan deıin otandastarymyz 2017 jyly Almatyda ótken baıraqty básekede 36 medal jeńip alǵan edi.

Týrındegi týrnırde Qazaqstan sportshylary 3 altyn, 4 kúmis jáne 7 qola júlde ıelendi. El qorjynyna frıstaılshy Anastasıa Gorodko qos altyndy salsa, bıatlonnan Nıkıta Akımov ánuranymyzdy Týrın tórinde bir ret shyrqatty. 

Dúnıejúzilik qysqy oıyndar ashylýynda kók týymyzdy ustap shyqqan Aıaýlym Ámrenova paralel mogýldan kúmis júlde ıelense, erler arasynan dál osy saıysta Anton Bondarevte kúmispen kúpteldi. Ýnıversıada baǵdarlamasyna tuńǵysh ret engen parashańǵy sport túrinde Denıs Zınov qos kúmisti oljalady.

Denısten bir saty tómen nátıje kórsetken parashańǵyshy Roman Qurbanovta qos medal enshiledi. Otandasymyzǵa buıyrǵany 2 qola medal. Al mánerlep syrǵanaýdan kútpegen nátıje tirkegen Sofá Samodelkına da qola júldege qol jetkizdi. Shyny kerek, bul qolanyń Qazaqstan úshin orny altynmen para par. Sondaı-aq, qolaǵa qol sozǵandar arasynda bıatlonshylar Arına Krúkova men Kırıl Baýer bar. 

Komandalyq saıysta short-trekten Qazaqstan quramasy qola medal ıelendi. Quramynda: Alına Ájiǵalıeva, Valerıı Klımenko, Dinmuhamedaldıar Tájibaı, Malıka Ermek syndy sportshylardan quralǵan bizdiń komanda aralas estafetadan júldegerler qataryna qosyldy. Jáne short-trektiń 5000 metrlik baǵdarlamasynda Dinmuhamedaldıar Tájibaı, Valerıı Klımenko, Aıbek Temirhan, Sanjar Janysov, Álisher Abdýlkatımovten quralǵan erler komandasy da qola medal jeńip aldy.

Osylaısha, álemniń 46 eli qatysqan baıraqty básekeni Qazaqstan quramasy jalpy esepte 12-orynmen aıaqtady. Eki aptaǵa sozylǵan dúnıejúzilik qysqy Ýnıversıada oıyndarynda Fransıa (18 altyn, 8 kúmis, 14 qola) birinshi oryndy ıelense, Ońtústik Koreıa quramasy (8-6-6) ekinshi orynǵa turaqtady. Úzdik úshtikti Fınlándıa (8-3-4) túıindedi.

Jalpy júldeler sany boıynsha Qazaqstan quramasy 14 júldemen 7-orynǵa jaıǵasty. 40 medaldi ıelengen Fransıa bul jaqta da kósh basynda. Al 23 júldeni utqan Germanıa ekinshi satyǵa ornalassa, úzdik úshtikte 20 medalmen Ońtústik Koreıa.