ALMATY. QazAqparat - Búgin Almatyda QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Almaty qalasy boıynsha departamenti jergilikti memlekettik qyzmetkerler arasynda QR memlekettik qyzmeti salasyndaǵy reformalardy túsindirý boıynsha semınar uıymdastyrdy.
«Bul shara qalamyzdaǵy memlekettik qyzmetkerlerge arnalyp otyr. Maqsat - olarǵa qazirgi tańda Parlament Senatynyń qaraýynda jatqan «Memlekettik qyzmet týraly» jańa zań jobasymen jan-jaqty tanystyrý jáne onyń erekshelikterin túsindirý. Oǵan kóp ózgerister engizildi. Mysaly, endi ásker qataryna shaqyrylǵan memlekettik qyzmetkerdiń jumys orny ol qaıtyp kelgenshe saqtalatyn bolady. Eger qazirgi aǵymdaǵy zańda 30 bap bolatyn bolsa, jańa jobada 72 bap bar. Iaǵnı, ózgerister kóp», - dedi Almaty qalalyq Tártiptik Keńestiń tóraǵasy Baqtıar Kamalov.
Ol sonymen qatar, jańa zań engizilgen soń memlekettik apparattyń kásibı deńgeıiniń joǵarylaıtyndyǵyn jáne basshylyq qyzmetterde laıyqty adamdardyń isteýi kerektigin kózdeıtin merıtokratıa úderisiniń tıimdi bola túsetindigin jetkizdi.
«Biz Sıngapýr, Kanada, Avstrıa sekildi elderdiń tájirıbelerin zerttedik. Biraq biz ózimizge qajettilerin ǵana alyp, óz baǵytymyzben júretin bolamyz», - dedi B. Kamalov.
Eýropalyq odaq jobasynyń bas sarapshysy Maksımılıan Fodınger memlekettik qyzmetti reformalaý aıasynda memlekettik qyzmetkerlerdi iriktep, basshylyq qyzmetterge taǵaıyndaý boıynsha halyqaralyq tájirıbeler jaıynda áńgimeledi.
Al semınardyń ekinshi sesıasynda «E-qyzmet» aqparattyq júıesin engizýdiń qyr-syry jaıly aıtyldy. Bul júıe memlekettik qyzmetkerler týraly kadrlyq aqparattardy onlaın rejiminde tolyqqandy alýǵa jáne baıqaýlyq irikteýdiń ashyqtyǵyn qamtamasyz etýge múmkindik beredi.
Aıta ketelik, búgingi sharaǵa qaladaǵy aýdan ákimderi, jergilikti atqarýshy organdardyń jáne ortalyq memlekettik organdardyń aýmaqtyq bólimsheleriniń basshylary, sondaı-aq, memlekettik qyzmetkerlerdi qaıta daıarlaý jáne biliktiligin arttyrý óńirlik ortalyǵynyń oqytýshylyq quramy qatysty.
Bul semınarǵa Eýroodaqtyń «Reforma jáne Qazaqstan Úkimetiniń memlekettik qyzmetin jańǵyrtý» jobasy tarapynan qoldaý kórsetildi.
Derekkóz: QazAqparat
