LMATY. QazAqparat - Búgin Almatyda Halyqaralyq aqparattar tehnologıasy ýnıversıtetinde álemniń jetekshi ýnıversıtetteriniń stýdentterge jáne óz betimen bilim alýshylarǵa arnalǵan qazaq tilindegi tegin onlaın kýrstarynyń tusaýy kesildi.
Uıymdastyrýshylardyń aıtýynsha, bul aýqymdy bilim berý jobasynyń basty maqsaty - joǵary deńgeıdegi halyqaralyq bilim kózderine qazaqstandyq stýdentter men óz betimen bilimin jetildirgisi keletinderdiń qolyn jetkizý. Ázirge, «Coursera» ınternet-portalynda qazaq tilinde bes pán iske qosylǵan. Olar www.coursera.org saıtynda onlaın-rejiminde qoljetimdi bolyp otyr.
«Biz bul kýrstardy, ıaǵnı pánderdi qazaq tiline aýdarýdy osydan bir jarym jyl buryn bastaǵan edik. Jumys óte kúrdeli boldy. Aǵylshyn tilindegi dáristerdi qazaq tiline sapaly aýdarý ońaı emes ekenine kózimiz jetti. Pánderdi aýdaryp bolǵan soń, olardy «Coursera» resýrsyna júktep, iske qostyq. Osylaısha, joǵary oqý oryndarynda oqýǵa múmkindigi bolmaǵan jandarǵa qazaq tilinde onlaın rejimi arqyly sapaly bilim alýǵa múmkindik týdy», - dedi jobaǵa qarjylaı qoldaý kórsetken uıym - «Kcell» kompanıasynyń korporatıvtik baılanystar boıynsha dırektory Natalá Eskova.
Aıta ketken jón, tańdap alynǵan kýrstar Qazaqstan ýnıversıtetterindegi standartty oqý baǵdarlamasyna kirmeıdi.
Degenmen, qazaqstandyq tyńdaýshylar osy pánder arqyly alǵan bilimderi men ıdeıalaryn keleshekte ózderiniń sartaptyq jobalaryna tıimdi paıdalana alady, deıdi uıymdastyrýshylar.
Sonymen, ázirge kópshilik úshin AQSH-tyń Batys rezervtik ýnıversıtetiniń ǵylym doktory Rıchard Boıatıs júrgizetin «Shabyt beretin kóshbasshylyq jáne emosıalyq ıntellekt» kýrsy jáne Kanadanyń Toronto ýnıversıtetiniń profesorlary Djennıfer Kempbel men Pol Grıs oqytatyn «Baǵdarlamalaýdy úıren: baǵdarlama jasaýdy bilmeıtinderge arnalǵan negizgi bilim» pánderi qoljetimdi. Al AQSH-tyń Pensılvanıa ýnıversıtetiniń profesory Kevın Verbahtyń «Geımıfıkasıa», ıaǵnı «Oıyndar teorıasyn bızneste qoldaný» kýrsy aldaǵy qarasha aıynan bastap ashylady. «Jeliler: dostar, aqsha jáne baıttar» (AQSH-tyń Prınston ýnıversıtetiniń profesory Mýng Chang júrgizedi) jáne «Elektrondyq medıa jáne mobıldik qosymshalarǵa arnalǵan kreatıvtik baǵdarlamalaý» (London ýnıversıtetiniń ǵylym doktorlary júrgizedi) kýrstarynyń ashylý ýaqyty aldaǵy aılarda belgili bolady.
Kýrstardyń uzaqtyǵy úsh aptadan on bes aıǵa deıin sozylady. Bilim berý úderisinde dárister, úı tapsyrmalaryn oryndaý, testilerden ótý jáne emtıhandar tapsyrý jumystary qamtylǵan.
Derekkóz: Qazaqparat
