ALMATY. QazAqparat - Almatyda qazaq ádebıettaný ǵylymy men Alash ardaqtylarynyń muralaryn Táýelsizdik turǵysynan saralaýǵa baǵyttalǵan ǵylymı monografıalardyń tusaýy kesildi.
Búgin Almatyda QR Ulttyq kitaphanasynyń Kórmeler zalynda M. O. Áýezov atyndaǵy Ádebıet jáne óner ınstıtýtynyń bas ǵylymı qyzmetkeri, fılologıa ǵylymdarynyń doktory, profesor Aıgúl İsimaqovanyń «Táýelsizdik jáne Alash ǵylymy», «Jazǵan sóz janym ashyp Alashyma...», «Qazirgi ádebıet pen ádebıetti zertteıtin qaýym», «Táýelsizdik jáne Alash ádebıettanýy», «Qazirgi ádebıettanýdyń teorıalyq máseleleri», «Qazaq ádebıettanýyndaǵy Táýelsizdik ıdeıasy», «Qazaq ádebıettanýy» dep atalatyn ǵylymı zertteýleri jáne fılologıa ǵylymdarynyń kandıdaty, osy ınstıtýttyń aǵa ǵylymı qyzmetkeri Aısulý Oısylbaıdyń «Ahmet Baıtursynuly: «Ádebıet tanytqyshtaǵy» qazirgi ádebıet teorıasy»dep atalatyn ǵylymı zertteý kitabynyń tusaýy kesildi.
Tusaýkeser rásimin Ulttyq kitaphanasynyń bas dırektory, QR Memlekettik syılyǵynyń ıegeri, Qazaqstannyń eńbek sińirgen qaıratkeri, jazýshy Álibek Asqar júrgizdi.
Igi sharaǵa M.O. Áýezov atyndaǵy Ádebıet jáne óner ınstıtýtynyń ókilderi, aqyndar men jazýshylar, Alash qaıratkerleriniń urpaqtary jáne stýdentter qatysty.
«Biz Alash ardaqtylarynyń muralaryna sońǵy kezge deıin keńestik júıeniń kózqarasymen qarap keldik. Osy bir keńestik psıhologıadan aryla almaı júrgenderimiz de bar. Sondyqtan, bul eńbekter eshkimdi beıjaı qaldyrmaıdy. Meniń oıymsha, bul qazaq ultyn taný úshin, egemendiktiń qundylyǵyn taný úshin, bolashaǵymyzdyń baǵdarshamy ispettes óte qajet dúnıeler. Olarda qazaq ádebıettanýynyń bastaýlary men damýy jáne onyń basty teorıalyq máseleleri, ejelgi ádebıet úlgileriniń zerttelýi, Alash ádebıettanýy, qazirgi ádebı baılanystardyń teorıalyq negizi, búgingi abaıtaný men alashtaný, álemdik ádebıettaný men postmodernızm týraly kásibı zertteýler Táýelsizdik kezeńi turǵysynan tuńǵysh ret júıeli túrde saralanǵan», - dedi óz sózinde M. Áýezov atyndaǵy Ádebıet jáne óner ınstıtýtynyń dırektory, fılologıa ǵylymdarynyń doktory, QR UǴA korespondent-múshesi Ýálıhan Qalıjanuly.
Aıta ketelik, kitaptarda ál-Farabı, Shoqan, Ybyraı, Abaıdan bastalatyn qazaq ádebıettaný ǵylymynyń negizderi, Alash ǵalymdary: Á. Bókeıhan, A. Baıtursynuly, M. Dýlatuly, H. Dosmuhameduly, J. Aımaýytuly, M. Jumabaı, Q. Kemeńgeruly, Y. Mustanbaıuly, S. Sádýaqasuly, Sh. Qudaıberdiuly, Q. Jubanov, M. Tynyshbaev, S. J. Aspandıarov, E. Bekmahanov, M. O. Áýezov, B. Kenjebaev, E. Ysmaıylov, T. Nurtazın, Q. Jumalıevtiń ádebıettanýlyq zertteýleri jáne ádebıettanýshylar R. Syzdyqova, Z. Qabdolov, M. Myrzahmetulynyń ǵylymı eńbekteri Táýelsizdik kezeńi turǵysynan qarastyrylǵan.
Derekkóz: QazAqparat
