ALMATY. QazAqparat - Almatyda qala ákimi Baýyrjan Baıbektiń tóraǵalyq etýimen quqyq qorǵaýshy jáne qadaǵalaýshy organ basshylarynyń otyrysy ótti.
Jıyn barysynda quqyqtyq tártip jáne áleýmettik-ekonomıkalyq salanyń basqa da máseleleri qaraldy. Bul týaly Almaty qalasy ákiminiń baspasóz qyzmetinen habarlady.
Óz sózinde Baýyrjan Baıbek ýákiletti organ basshylaryna quqyq buzýshylyqtyń kez kelgen túrine qatysty «nóldik tózbeýshilikti» qalyptastyrýǵa baǵyttalǵan aldyn alý sharalaryn belsendi túrde qoldanýdy tapsyrdy.
«Polısıa qyzmetkeriniń pozıtıvti bet-beınesin qalyptastyrý jumystaryn júrgizý kerek. Bul úshin olardyń azamattar aldyndaǵy jaýapkershiligin arttyryp, quqyqtyq retteý salasynda olardyń qyzmetiniń ashyqtyǵyn jáne qoljetimdigin qamtamasyz ete otyryp, is-tájirıbede «azamattarǵa arnalǵan qyzmet» qaǵıdasyn qoldaný qajet», - dedi qala ákimi.
Jıyn qorytyndysy boıynsha túngi klýbtar men basqa da saýyq qurý mekemelerinde esirtki zattarynyń zańsyz aınalymyn anyqtaý jáne jolyn kesý boıynsha shara qoldaný jóninde sheshim qabyldandy.
Sonymen qatar, joldarda jol-kólik apattarynyń kóbeıip jatqandyǵy da sóz boldy.
«Almatyda jol-kólik oqıǵalarynyń ortasha sany ortasha respýblıkalyq deńgeıden eki ese joǵary. Sondyqtan, jol-patrýl polısıasy qyzmetkerleri joldarda jóndeý jumystary júrgizilip jatqan kezde jáne tańǵy jáne keshki ýaqytta paıda bolatyn qarbalas sátterde kólik qozǵalysyn retteý ádisin jetik meńgerýleri kerek», - dedi B. Baıbek.
Odan basqa, shaǵyn jáne orta bıznes sýbektilerin tekserý máseleleri qaraldy. Almaty ákimi qala búdjetiniń kirisi negizinen shaǵyn jáne orta bıznes sýbektilerinen túsetindigin, sondyqtan bul sektorǵa qoldaý kórsetý maqsatynda olardy negizsiz tekserýlerden oqshaýlaý kerektigin aıtty.
Otyrysta sondaı-aq, jer qatynastary salasynda ashyqtyqty qamtamasyz etý máselesi kóterildi. Osyǵan baılanysty B. Baıbek tıisti organ basshylaryna turǵyndar arasynda jer telimderin satyp alý, qurylys jumystaryna ruqsat alý jóninde túsindirý jumystaryn júrgizip, osy salada zań buzýshylyqqa qatysty jaýapkershilikti arttyrýdy tapsyrdy.
Derekkóz: Qazaqparat
