ORAL. QazAqparat - QR Ulttyq ulany «Batys» óńirlik qolbasshylyǵy basqarmasynda Oral garnızonynyń áskerı prokýrory, ádilet polkovnıgi Altynbaı Raevtyń tóraǵalyq etýimen qylmystyq quqyqbuzýshylyqty tirkeý men qylmystyq isterdi tergeý kezinde zańdylyqtyń saqtalýy, áskerı bólimder men mekemelerde jeke jáne zańdy tulǵalar shaǵymdaryn qaraýdy jetildirý maqsatynda QR Bas prokýratýrasynyń «Aıqyn» ınovasıalyq jobasyn qoldaný máseleleri talqylandy.
«Batys» óńirlik qolbasshylyǵynyń baspasóz qyzmetinen túsken málimetke qaraǵanda,   Altynbaı Raevtyń atap ótkenindeı, bıyl Oral garnızony qylmystyq izdestirý organdarynyń jańa qylmystyq úderis jaǵdaıyna beıimdelýi qamtamasyz etildi. Sotqa deıingi óndiris sapasyn arttyrý maqsatynda tıisti sharalar alyndy.

Jıynǵa qatysqan QR bas áskerı prokýratýrasy quqyqtyq statısıka jáne arnaıy esepke alý komıteti basqarmasy bastyǵynyń orynbasary, ádilet polkovnıgi Baqyt Nurmanovtyń aıtýynsha, «Aıqyn» jobasyn engizýdiń mańyzdylyǵy sonda, keıbir áskerı bólimder men mekemeler azamattardyń aryz-shaǵymyna jetkilikti mán bermeıdi, mazmunyna úńilip, qaraý merzimin saqtamaıdy. Bul aryz-shaǵymnyń kóbeıýine áser etýde.

Bas áskerı prokýratýranyń aǵa prokýrory, ádilet aǵa leıtenanty Ernur Maǵazovtyń sózine qaraǵanda, azamattar men uıymdar  óz aryzdarynyń qaralý barysyn «Aıqyn» jobasy boıynsha ǵalamtor arqyly baqylap otyra alady.  Sonymen qatar áskerı prokýratýranyń qadaǵalaýynan bólek, memlekettik organdardyń aryz-shaǵymdardy qaraýyna turaqty áleýmettik baqylaý da ornatylady. Eń bastysy, «Aıqyn» jobasy sybaılas jemqorlyqtyń aldyn alyp, azamattardyń konstıtýsıalyq quqyǵyn qorǵaıdy.