QYZYLORDA. QazAqparat - Qyzylordada Qazaq handyǵynyń 550 jyldyǵyna jáne Qazaqstan halqy Assambleıasynyń 20 jyldyǵyna arnalǵan ulttyq sport túrlerinen Qazaqstan Respýblıkasynyń IV festıvaliniń saltanatty ashylý sharasy ótti.
Uly dalanyń ulylyǵyn aıshyqtaıtyn sharaǵa oblys ákimi Qyrymbek Kósherbaev, QR Sport jáne dene shynyqtyrý isteri komıteti tóraǵasynyń orynbasary Ábil Donbaı jáne QR Ulttyq sport túrleri qaýymdastyǵynyń prezıdenti Bekbolat Tileýhan qatysty.
Tórt jylda bir márte uıymdastyrylatyn festıvál sporttyń 13 túri boıynsha ótedi. Atap aıtsaq, alaman báıge, báıge, qunan báıge, kókpar, aýdaryspaq, teńge ilý, qyz qýý, toǵyzqumalaq, asyq atý, qazaq kúresi, qusbegilik, jamby atý, jekpe-jek. Sondaı-aq, «Sándi kıiz úıler» baıqaýy men «Keremet sáıgúlik» sulý attar baıqaýy da uıymdastyrylady.
- Ulttyq sport - ótkenimiz ben búginimizdi baılanystyryp, keleshekke jeteleıtin baǵa jetpes baılyǵymyz, asyl qazynamyz. Sondyqtan zerttep, zerdelep jas urpaqqa úıretý paryzymyz. Bul baǵytta oblysymyzda jańadan ıpodrom salynyp, ulttyq sport túrleri jandandyrylýda. Búgingi bási joǵary básekede shyn myqtylardyń jeńiske jetýine tilektespin, - dedi oblys ákimi Q.Kósherbaev.
- Qashannan ultymyzdyń qaımaǵy buzylmaǵan halyq ekendigin osyndaı festıválden bilemiz. Elimizdiń qaı jerinde bolmasyn ulttyq sport túrlerinen ótetin básekelerde Syr sportshylary belsendi qatysýda. Bul óńirdiń qanymyzda bar qasıetti ulyqtaǵany. Uly dalany ata-babamyz atpen baǵyndyrǵanyn jaqsy bilesizder. Sondyqtan atqa qonǵan sportshylarǵa sáttilik tileımin, - dedi QR Ulttyq sport túrleri qaýymdastyǵynyń prezıdenti Bekbolat Tileýhan.
Elimizde 265 myńnan astam adam ulttyq sport túrlerimen aınalysatyn bolsa, Syr elindegi festıválge barlyq aımaqtan 2 myńǵa jýyq sportshy qatysýda.
Saltanatty shara barysynda festıváldiń jalaýyn jamby atýdan el chempıony Jarqynbek Almaǵambetov ortaǵa ákelip, ony 15 dúrkin túıe palýan Abylaı Joldybaev joǵaryǵa kóterdi. Al jarystyń alaýyn estafetamen Islam Salımov, Rústem Sybaı, Hakimjan Eleýsinder alyp ótip, Qazaqstannyń tuńǵysh barysy Ulan Rysqulǵa tabystady. Ol kóptiń qoshemetimen alaýdy tutandyrdy. Osylaısha festıvalm saltanatty túrde ashyldy. Aıta keteıik, báseke 20 qazanǵa deıin sozylady.
Derekkóz: QazAqparat
