ASTANA. QazAqparat - 17 qazanda Shymkentte «Qala kúni» merekesi atap ótildi. Ońtústik Qazaqstan oblysynyń ákimi Beıbit Atamqulov shahar turǵyndary men qonaqtaryn ataýly kúnmen quttyqtap, ońtústikqazaqstandyqtardy bolashaq úshinshi megapolısti birge kórkeıtýge shaqyrdy, dep habarlaıdy oblystyq ákimdiktiń baspasóz qyzmeti.
Túrkistan saraıynda uıymdastyrylǵan sharada aımaq basshysy qalamyzdyń túrli salalar boıynsha damýyna úles qosqan birqatar azamattardy «Shymkent qalasynyń Qurmetti azamaty» ataǵymen marapattady.
Shymqalanyń turǵyndary qala kúnin bir aptadan beri keń kólemde toılap keledi. Atap aıtsaq, 10-17 qazan kúnderi aralyǵynda ótken merekelik sharalardyń birinshi kúni «Jańarý men tazalyq», ekinshi kúni «Salamatty ómir salty kúni», úshinshi kúni «Bolashaqtaǵy - Shymkent», tórtinshi kún «Shymkent - dostyq mekeni», besinshi kún «Ǵasyrlar toǵysyndaǵy qala», altynshy kún «Shýaǵyn shashqan Shymqala» shattyq kúni aıdarlarymen atalyp ótilse, búgin «Yrys aldy - yntymaq» taqyrybynda toılandy.Tań sáriden Shymqaladaǵy saıabaqtar men ortalyq alańdardy merekelik kóńil-kúı jaılady.
Aýa raıynyń qolaısyzdyǵyna qaramastan shahar jurtshylyǵy qaladaǵy Abaı, Jeńis, Ortalyq saıabaqtary men Naýryz alańynda tigilgen kıiz úılerden dám tatyp, altybaqandarda asyr salsa, ortalyq atshabarda báıge, qyz qýý sekildi ulttyq oıyndar ótti.
Sharada kúmis kómeı ánshiler men myń buralǵan bıshiler kelýshilerge shattyq kóńil kúıin syılady. Sondaı-aq, Qazaq handyǵynyń 550 jyldyǵyna arnalǵan monýmenttiń mańynda OQO-nyń 15 aýdan-qalasynyń kıiz úıleri tigilip, ár aýdannyń shyǵarmashylyq ujymdary mereıtoıǵa arnalǵan konserttik baǵdarlama uıymdastyrsa, tús aýa Naýryz alańynda «Altyn kúz» festıvali men «Shyǵys bazary» úlgisindegi etnoaýyl saýda qatary usynyldy.
Shymkent qalasynyń mereıli merekesi Túrkistan saraıyndaǵy gala konsertte jalǵasty. Otandyq jáne shetelden kelgen ánshiler óner kórsetken bul sharany qala halqy ǵana emes, búkil ońtústikqazaqstandyqtar tikeleı efır arqyly «Qazaqstan-SHymkent» telearnasynan tamashalaı aldy.
Derekkóz: Qazaqparat
