ASTANA. QazAqparat - 16 qazan kúni Batys Qazaqstan oblystyq qazaq drama teatrynda «Áıel. Saıasat. Qoǵam» degen taqyrypta halyqaralyq konferensıa bolyp, oǵan batysqazaqstandyqtarmen qatar Reseıdiń kórshiles Orynbor, Samara jáne Qazaqstannyń Mańǵystaý, Atyraý oblystarynan belsendi áıelder qatysty.
Jıynda oblys ákiminiń birinshi orynbasary Arman Óteǵulovtyń atap ótkenindeı, qazirgi tańda áıelder qoǵam men saıasatta belsendi kúshke aınalyp, olardyń arasynan shyqqan basshylar men kásipkerler sany da kóbeıip keledi. Bul jaǵynan alǵanda, Batys Qazaqstan oblysy el óńirleri ishinde aldyńǵy qatarda.
Májilis depýtaty, QR Prezıdenti janyndaǵy Áıelder isteri jáne otbasylyq-demografıalyq saıasat jónindegi ulttyq komısıa tóraıymynyń orynbasary Elena Tarasenkonyń aıtýynsha, bılik pen saıasat tutqasyn ustaıtyndardyń arasynda áıelderdiń barynsha kóbirek bolýy qoǵamdaǵy turaqtylyq pen kelisimdi nyǵaıtady. Statısıka kórsetip otyrǵanyndaı, parlamenti men úkimetinde áıelder sany 25-35 paıyzdan az elderde ana men balany qorǵaý, balalar quqyǵyn, otbasy qundylyqtaryn saqtaý máseleleri jetkilikti sheshilmeıdi. Ulttyq komısıa qyzmeti nátıjesinde Qazaqstanda otbasylyq-demografıalyq jáne genderlik saıasatty sheshýdi memlekettik qoldaýdyń biryńǵaı júıesi jasalǵan. Elbasy Jarlyǵymen 2006 jyly 10 jylǵa eseptelgen genderlik teńdik strategıasy bekitilgeni málim. Kúni búgin atalǵan strategıanyń negizgi baǵyttary oryndaldy dep aıtýǵa bolady. Qazaqstan sondaı-aq áıelderge qatysty zorlyq-zombylyqty joıý jónindegi halyqaralyq talaptardy da saqtap keledi.
QR Bas prokýratýrasy Quqyqtyq statısıka jáne arnaıy esepke alý jónindegi komıtetiniń tóraıymy, tuńǵysh áıel general Sáýle Aıtpaeva óz sózinde otbasyndaǵy urpaq tárbıesi, jasóspirimder quqyǵyn qorǵaý máselelerine de erekshe mán berdi.
Orynbor oblysy áleýmettik damý mınıstriniń orynbasary Roza Palatovanyń sózine qaraǵanda, Qazaq elinde genderlik teńdik máselesi óz deńgeıinde sheshilgen. 1997 jylǵy qarashada Almatyda ótken úshinshi halyqaralyq Ortalyq Azıa konferensıasynda Qazaqstanda osy másele keńinen talqylanyp, bastapqy qadamdar jasalǵan bolatyn. Sodan bergi on segiz jyl merzimde bul is óz jemisin berdi. Saýatty da isker áıelder sany áldeqaıda artyp, olar mańyzdy memlekettik sheshimderdi qabyldaýǵa atsalysýda.
Konferensıa delegattary áıelderdiń kóshbasshylyq róli, Elbasynyń «Nurly jol» baǵdarlamasyna sáıkes jańa múmkindikter men tyń jobalar, ondaǵy názik jandylardyń úlesi, genderlik teńdikti júzege asyrýdyń básekege qabilettilikti arttyrýǵa yqpaly tóńireginde oı-pikirleri men usynystaryn ortaǵa saldy. Sonymen qatar isker áıelder óz bıznesin ashý men damytý baǵytynda trenıńterge de qatysyp, paıdaly aqyl-keńesterge qanyqty.
Derekkóz: Qazaqparat
