ALMATY. QazAqparat - Búgin Almaty qalasynyń «Astana» alańynda Almaty oblysynyń aýyl sharýashylyǵy taýarlaryn óndirýshileriniń jármeńkesi ótip jatyr. Oǵan 16 aýdan men Taldyqorǵan, Qapshaǵaı jáne Tekeli qalalarynan jalpy somasy 110 mıllıon teńge bolatyn, ekologıa jaǵynan taza ári sapaly 300 tonna ónim jetkizildi.
«Almaty oblysynda qazir kókónisterdiń, jemis-jıdekterdiń naǵyz pisken kezi ǵoı. Sondyqtan bul joly olar kóp ákelindi. Jalpy, taýarlardyń ishinde et ónimderi - 67 tonna, kartop - 37 tonna, kókónis - 27 tonnany quraıdy. Sonymen qatar, azyq-túlik taýarlary arasynda Almaty oblysynyń brendine aınalǵan - Qoǵalynyń kartoby, Alakóldiń balyǵy, Lepsi óńiriniń baly bar. Taýar óndirýshiler óz ónimderin ózderi, ıaǵnı deldalsyz satyp jatyr. Sáıkesinshe, barlyq taýarlardyń baǵasy bazar narqynan 15-20 paıyzǵa arzan», - dedi Almaty oblystyq aýyl sharýashylyǵy basqarmasy basshysynyń orynbasary Qudaıbergen Bekbosynov.
Sonymen qatar, ol Almatyǵa jaqyn ornalasqan aýdandardyń taýar óndirýshileri Almaty qalasy men oblysy ákimdikteriniń kelisimi boıynsha,Almatyda apta saıyn jármeńke ótkizip turatyndyǵyn aıtty.
«Talǵar aýdany «Juldyz» bazarynda, İle aýdany «Qazaqfılm» móltekaýdanynda jáne Eńbekshiqazaq aýdanynyń taýar óndirýshileri Túrkisib aýdanynda apta saıyn jármeńke ótkizip turady. Al iri agroholdıngter men agrofırmalar qaladaǵy meıramhanalar, qonaq úıler jáne saýda úılerimen taýar jetkizip turý boıynsha derbes kelisim-sharttar jasasqan», - dedi Q. Bekbosynov.
Aıta ketelik, Almaty oblysynyń taýar óndirýshileri «Astana» alańynda bıylǵa osymen úshinshi ret jármeńke ótkizip jatyr. Buǵan deıin uıymdastyrylǵan jármeńkege 280 tonna ónim jetkizilgen bolatyn.
Jármeńke ádettegideı 16:00-ge deıin jalǵasady.
Osy ýaqyt aralyǵynda Tóle bı kóshesiniń Abylaı han dańǵylynan Fýrmanov kóshesine deıingi aralyǵynda jáne Panfılov kóshesiniń Bógenbaı batyr kóshesinen Qazybek bı kóshesine deıingi aralyǵynda kólik qozǵalysy ýaqytsha jabylady.
Derekkóz: Qazaqparat
