ASTANA. QazAqparat - Búgin Aqmola oblysyna qarasty Býrabaı kýrorttyq aımaǵynda Joǵary Eýrazıalyq ekonomıkalyq keńes  otyrysy ótti. Bul týraly Aqordanyń baspasóz qyzmeti habarlaıdy. 
İs-sharaǵa Qazaqstan Respýblıkasynyń Prezıdenti Nursultan Nazarbaev, Armenıa Respýblıkasynyń Prezıdenti  S.Sargsán, Belarýs Respýblıkasynyń Prezıdenti  A.Lýkashenko, Qyrǵyz  Respýblıkasynyń Prezıdenti A.Atambaev, Reseı Federasıasynyń Prezıdenti V.Pýtın qatysty.

Otyrysty ashqan Nursultan Nazarbaev kelissózderdiń jemisti bolǵanyn, sondaı-aq qol qoıylǵan qujattardyń mańyzdylyǵyn atap ótti.

Shara barysynda taraptar EAEO jumysynyń qorytyndysyn shyǵaryp, damýdyń jańa perspektıvalaryn belgiledi. Odaq qyzmetiniń máseleleri talqylandy, sonyń ishinde Eýrazıalyq ekonomıkalyq komısıa alqasy quramynyń sany bekitilip, onyń Jumys kestesine ózgeris engizildi. Sonymen birge EEK-tiń kelesi jylǵy basshysynyń kandıdatýrasy kelisildi. Jańa músheler qabyldaý jáne EAEO-daǵy múshelikti doǵarý tártibi qabyldandy.  

Otyrysqa qatysýshylar EAEO men «Jibek joly ekonomıkalyq beldeýi» jumysyn úılestirý jónindegi is-qımyldarǵa arnaıy toqtaldy.

Memleketter basshylary Odaqtyń úshinshi eldermen jáne halyqaralyq uıymdarmen ózara is-qımyl tártibin talqylady. Máselen, Izraılmen erkin saýda aımaǵy týraly kelisim jasaýǵa qatysty kelissózderdi bastaý týraly sheshim qabyldandy.

Elimizdiń DSU-ǵa kirýine baılanysty negizgi jaıttar Qazaqstan tarapynyń bastamasymen qarastyryldy.

Sonymen qatar qyzmet kórsetý sektorlarynyń tizbesi bekitildi, osyǵan oraı EAEO aıasynda qyzmet kórsetýdiń biryńǵaı naryǵyn qalyptastyrý yryqtandyrý josparyna sáıkes júrgiziletin bolady.

Sońynda sharaǵa qatysýshylar kún tártibi mazmundy, atqarylǵan jumys  tıimdi bolǵanyn atap ótti.

Keńestiń kelesi josparly otyrysy bıylǵy jeltoqsanda Máskeýde ótedi. 

Derekkóz: QazAqparat