ASTANA. QazAqparat - Búgin Aqtóbe rels-arqalyǵy zaýyty (ARAZ) otandyq rels ónimderi prokatyn shyǵardy.
Saltanatty is-sharaǵa «QTJ» UK» AQ prezıdenti A.Mamın, «Siemens S.p.a» kompanıasynyń bas dırektory Djýzeppe Ferrarıo, QR ınvestısıalar jáne damý mınıstri Áset Isekeshev, Aqtóbe oblysynyń ákimi Berdibek Saparbaev, Qyrǵyzstan kólik jáne komýnıkasıa mınıstri Arǵynbek Malabaev, «Ázirbaıjan temir joldary» JSHS tóraǵasy Djavıd Gýrbanov qatysyp, sóz sóıledi.
Sharaǵa qatysýshylar qatarynda Parlament depýtattary, TMD jáne Baltyq jaǵalaýy elderi temir jol ákimshilikteri men temir jol ónimderin shyǵaratyn kásiporyndardyń ókilderi boldy.
«Qazaqstan temir joly» UK» AQ prezıdenti A. Mamınniń aıtýynsha, Memleket basshysynyń ındýstrıalyq baǵdarlamaǵa saı tapsyrmasymen Qazaqstanda qysqa merzimde temir jol kóligin jasaýdyń jańa salasy qalyptasty. Álemdik jetekshi kompanıalar General Elektric, Alstom,Talgo, Siemens qatysýymen júk jáne jolaýshylar teplovozdaryn, elektrovozdar, vagondar, iri vagon quımalaryn, ınfraqurylymdyq tehnıkalyq quraldar shyǵaryla bastady.
A. Mamın sondaı aq, tuńǵysh otandyq rels óniminiń Qazaqstannyń ındýstrıalyq tarıhynda mańyzdy oqıǵa ekendigine toqtaldy.
ARAZ-dyń jobalyq qýaty jylyna 430 myń tonna metal ónimderin shyǵarýǵa jetedi. Onyń basty ónimi termoqysymǵa shydamdy R-65 markaly uzyndyǵy 120 metrge jetetin joǵary jyldamdyqty magıstralǵa arnalǵan relster shyǵarady. Oǵan qosa, jylyna 230 myń tonna rels arqaýlary, buryshtamalar, shvellerler shyǵarady. Bul temir jol ónimderi Qazaqstandy ǵana emes, kórshiles memleketterdiń de suranysyn qanaǵattandyrady.
Sondaı-aq, bul kúni Qazaqstandaǵy temir jol kóligi mashınasyn jasaý salasynda seriktestik jáne bolashaǵyna arnalǵan dóńgelek ústel otyrysy da ótkizildi. Ondaǵy talqylaý barysynda qazaqstandyq «Tulpar-Talgo», «Elektrovoz qurastyrý zaýyty» (EQZ), «Lokomotıv qurastyrý zaýyty (LQZ) zaýyttaryndaǵy temir kóligi ónimderiniń tusaýkeseri jasalyp, ony eksportqa shyǵarýdyń «Qazaqstannyń Damý Banki» AQ qoldaýymen júzege asyrý jaıy saraptaldy.
Dóńgelek ústelge qatysýshylardyń aıtýynsha, Eýrazıalyq aımaqtaǵy temir jol kóligi mashınalary ónimderin shyǵaratyn zaýyttar men qarjylyq ınstıtýttardyń arasynda tyǵyz qarym-qatynas ornaǵan.
Onyń ishinde atap aıtarlyǵy, qazaqstandyq eksportta «Qazaqstannyń Damý Banki» AQ qoldaý júıesi týraly basqarma tóraǵasy B.Jámishev baıandady. Onyń aıtýynsha, bank ARAZ qurylysyn qarjylandyryp qana qoımaı, endigi jerde onyń sheteldik tutynýshylarǵa ótkizý jaıyn da mindetin alyp otyr.
Dóńgelek ústel otyrysynda Ázerbaıjan, Belarýs, Grýzıa, Ózbekstan, Tájikstan, Qyrǵyzstanǵa ARAZ daıyn ónimderin jetkizý týraly Memorandýmǵa qol qoıyldy, dep habarlaıdy «QTJ» UK» AQ baspasóz qyzmetinen.
Derekkóz: Qazaqparat
