ORAL. QazAqparat - Búgin,16 qazanda Qadyr Myrza Áli atyndaǵy mádenıet jáne óner ortalyǵynda Rýhanı kelisim kúnine oraı «Rýhanı kelisim - el birligine bastar jol» taqyrybynda dóńgelek ústel otyrysy ótkizilip, oǵan memlekettik mekemeler, dinı jáne etnomádenı birlestikter, úkimettik emes uıymdar ókilderi qatysty.
BQO din isteri basqarmasy basshysynyń mindetin atqarýshy Saıalbek Ǵızzatovtyń atap ótkenindeı, 1992 jyly Elbasynyń qatysýymen Almatyda ótken Búkilálemdik rýhanı kelisim kongresinen bastaý alǵan atalmysh mereke Qazaqstandaǵy 130-dan astam ult ókilderiniń, sondaı-aq túrli dinı konfesıalardyń jarasymyn arttyryp, el birligin nyǵaıtýǵa septesip keledi. Óńirde kúni búgin 74 dinı birlestik, 9 konfesıa qyzmet etýde. Basty mindet - ultyna, nendeı dinı nanym-senimdi ustanatyndyǵyna qaramastan, olardyń bárin de tatýlyq týy astynda, ortaq maqsat jolynda ómir súrýge úndep, yrys-yntymaǵyn baıyta bilý. Elbasy Nursultan Ábishuly Nazarbaev jahandyq qaterlerden saqtaný qajettigin únemi aıtyp keledi. Qazirgi ýaqytta ult jáne dinaralyq qaqtyǵystar az bolyp jatqan joq. Ásirese, Sırıadaǵy soǵys kúlli álemdi alańdatýda. Keıbir qazaq jastarynyń jat aǵymdarǵa ilesip, shet eldegi shaıqastarǵa qatysýy barsha otandasymyzdy oılandyrýy kerek. Dinı ekstremızm men lańkestikke tosqaýyl qoıýda barlyq ult ókilderi arasyndaǵy rýhanı kelisimdi saqtaýdyń mańyzy zor. Eń bastysy, qoǵamda izgilik, ımandylyq, adamgershilik, meıirimdilik, ózara túsinistik sıaqty uǵym-qasıetter saltanat qurýy tıis. Sonda ǵana Elbasymyz «Nurly jol - bolashaqqa bastar jol» atty Joldaýynda atap kórsetkenindeı, «Máńgilik el» ıdeıasyn ustanǵan Qazaq eli táýelsizdigin eshqashan da joǵaltpaıdy.
Jıynda sondaı-aq Oral qalalyq meshitiniń ımamy Álemhan Turlybekov, Oraldaǵy rım-katolık shirkeýiniń basshysy Peter Sakmar, «Lamed» evreı etnomádenı birlestigi jetekshisiniń orynbasary Felıks Baıýkanskıı jáne basqalary rýhanı kelisimdi nyǵaıtýdaǵy óz oı-tolǵamdarymen bólisti.
Shara sońynda oblys turǵyndaryna arnalǵan úndeý qabyldanyp, dinı birlestikter ókilderi D.Qonaev atyndaǵy saıabaqta aǵash otyrǵyzdy.
Óńirde Rýhanı kelisim kúnine arnalǵan basqa da sharalar ótýde.
Derekkóz: Qazaqparat
