ASTANA. QazAqparat  - QR Investısıalar jáne damý mınıstri Áset Isekeshev pen Aqtóbe oblysynyń ákimi Berdibek Saparbaev Aqtóbede ótken jumys otyrysy barysynda osy aımaqta Indýstrıalandyrý baǵdarlamasynyń ekinshi bes jyldyǵy men «Nurly jol» baǵdarlamasynyń júzege asyrylý barysyn talqylady.
Bul týraly Investısıalar jáne damý mınıstrliginiń baspasóz qyzmeti habarlady.

Aqtóbe oblysyna jasaǵan jumys sapary kezinde mınıstr birqatar kásiporyndardy aralap, «Aqtóbe rels -arqalyq zaýyty» JSHS-nyń birinshi relsterin shyǵarý saltanatyna qatysqan. Investısıa mınıstri sondaı-aq «Qazhrom» kompanıasynyń feroqorytpa zaýytynyń jumysymen de tanysty.

«Feroqorytpa zaýytynda  arnaıy baǵdarlamamen bilim alǵan mamandar jumys isteıdi. 2015 jyldyń qańtar-tamyz aılarynda zaýyttyń №4 sehy 56 myń tonna ferrohrom alǵan. Jalpy, 2015 jyldyń josparyna saı,  zaýyt 439 myń tonna, sonyń ishinde, №4 seh 74 myń tonna ónim óndirýi kerek»,-delingen baspasóz qyzmettiń taratqan aqparatta.

Jalpy, 2015 jyldyń shildesindegi jaǵdaıǵa súıensek, Indýstrıalandyrý kartasyna Aqtóbe oblysynan 83 ınvestısıalyq joba qosylǵan. Onyń ishinde, 74 joba 2010-2014 jyldar aralyǵynda paıdalanýǵa berilgen. Osy kásiporyndar iske qosylǵan soń 6,6 myń turaqty jumys orny ashylǵan. Qalǵan 9 joba ındýstrıalandyrý baǵdarlamasynyń ekinshi bes jyldyǵy aıasynda júzege asyrylmaq. Jumys otyrysy kezinde mınıstr Áset Isekeshev pen ákim Berdibek Saparbaev aımaq boıynsha «Nurly jol» baǵdarlamasynyń júzege asyrylý barysyn, «Batys Eýropa-Batys Qytaı»  kólik dáliziniń óńir arqyly ótetin aýmaǵyn 2016 jyly salyp bitý máselesin, sondaı-aq, Ortalyq-Batys-Aqtóbe-Atyrý-Astrahan baǵytyndaǵy tas joldyń qurylysyn bastaý máselelerin talqylady. Á.Isekeshev atap ótkendeı, birqatar ekonomıkalyq qıyndyqtarǵa qaramastan,  el boıynsha ındýstrıalandyrý baǵdarlamasy men «Nurly jol» baǵdarlamasynyń oryndalý qarqyny báseńdegen joq»,-dep tolyqtyrǵan mınıstrliktiń baspasóz qyzmeti.

Derekkóz: QazAqparat