ALMATY. QazAqparat- Qazaqstanda 2016 jyldyń 1 qańtarynan bastap tuńǵysh ret «Joǵary jáne joǵary oqý ornynan keıingi bilim mamandyqtary Jikteýishine» magıstratýra deńgeıi boıynsha «Sot saraptamasy» mamandyǵy engiziledi.
Bul týraly búgin Almatyda Qazaqstan Respýblıkasy Ádilet mınıstrliginiń Sot saraptamasy ortalyǵynyń uıymdastyrýymen ótken «Shyǵys-Batys: sot saraptamasyndaǵy áriptestik. Sot saraptamasynyń teorıasy men tájirıbesiniń ózekti máseleleri» halyqaralyq ǵylymı-tájirıbelik konferensıasy barysynda QR Ádilet mınıstrliginiń Sot saraptamasy ortalyǵynyń dırektory Isıdor Borchıshvılı málim etti.
Onyń aıtýynsha, qazir bul mamandyqty Jikteýishke PhD doktorantýrasy deńgeıi boıynsha da engizý jumystary júrgizilýde. Aldaǵy ýaqytta bakalavr deńgeıi boıynsha da jumystar qolǵa alynýy múmkin.
«Qazaqstan Respýblıkasynyń «Joǵary jáne joǵary oqý ornynan keıingi bilim mamandyqtary Jikteýishinde» «Sot saraptamasy» mamandyǵy tipti bolǵan joq. Bul jaǵdaıda sot-saraptama mamandyǵy boıynsha magıstr jáne doktorlardy daıarlaý óte qıyn soqty. Al, QR quqyq qorǵaý organdaryn 2020 jylǵa deıin jańǵyrtý memlekettik baǵdarlamasynda sot-saraptama mamandyǵy boıynsha magıstrlar, doktorlar daıarlaý kózdelgen. Biz sol úshin 2014 jyly - bir jyl boıy QR Bilim jáne ǵylym mınıstrligimen júıelik jumystar júrgizdik. Budan basqa, elimizdiń birqatar joǵary oqý oryndarymen sot sarapshylarynyń biliktiligin arttyrý máselesi boıynsha yntymaqtastyq ornattyq», - dedi I. Borchıshvılı.
Sonymen qatar ol sot saraptamalarynyń jańa túrlerin ázirleý kerektigin jetkizdi.
«Qazir Qazaqstanda 44 saraptamalyq mamandyq boıynsha 22 túrli sot saraptamasy júrgiziledi. Bul jetkilikti me? Olar zaman talabyna jaýap bere ala ma? Saraptamalyq is-tájirıbeler, quqyq qorǵaý jáne basqa da organdar men sottardyń qajettilikteri boıynsha jasalǵan taldaýlardyń nátıjelerine, el ishindegi jáne shet elderdegi qazirgi jaǵdaıǵa qaraıtyn bolsaq, bizdiń júrgizip jatqan saraptamalarymyz transulttyq qylmystar, lańkestik áreketter, tehnogendik sıpattaǵy apattar, áýe kólikterindegi apattar sekildi qaýip-qaterlerge tolyq kólemde jaýap bere almaıdy eken. Ne isteý kerek? Myna jahandaný kezeńinde, memleketter ár túrli odaqtarǵa birigip jatqan shaqta, sheteldik áriptestermen keıbir saraptama túrleri boıynsha ortaq ádisteme ázirleý kerek dep sanaımyn. Bul sot-saraptamalyq zertteýlerdi tıimdi júrgizýge múmkindik berer edi. Biz túrli elderdiń sot saraptamasy organdarynyń kúshin biriktirýimiz qajet. Sonda kez kelgen qaýip-qaterge qarsy tura alamyz», - dedi I. Borchıshvılı.
Qazir elimizde sot sarapshylary QR Ádilet mınıstrliginiń Sot saraptamasy ortalyǵy jáne «Bolashaq» memlekettik baǵdarlamasy arqyly shet elderde daıarlanady ári biliktiligin arttyrady.
Bıyl osy baǵdarlama aıasynda Sot saraptamasy ortalyǵynyń 18 sarapshysy Londonnyń ekonomıka jáne saıası ǵylymdar mektebinde bir jyldyq taǵlymdamadan ótken. Sonymen qatar, 87 sarapshy bıyl basqa da elderde bilimderin jetildirip qaıtqan.
Aıta ketelik, búgingi halyqaralyq konferensıaǵa QR Ádilet mınıstrliginiń ókilderi, QR Parlamentiniń depýtattary, Qazaqstannyń sot saraptamasy mekemeleriniń basshylary men jetekshi sarapshylary jáne Armenıa, Ázerbaıjan, Belarýs, Vetnam, Qyrǵyzstan, Qytaı, Reseı, Tájikstan, Túrkıa, Ýkraına jáne basqa da elderden kelgen ǵalymdar, barlyǵy 150-den astam adam qatysty.
Derekkóz: Qazaqparat
