ASTANA. QazAqparat - Aıdyn Aıymbetov Taldyqorǵan qalasynyń qurmetti azamaty atandy, dep habarlaıdy Almaty oblysy ákiminiń baspasóz qyzmetinen.
Ǵaryshty baǵyndyrǵan elimizdiń úshinshi perzenti Aıdyn Aıymbetov jerlesterimen júzdesý úshin óziniń týǵan jeri Taldyqorǵan shaharyna arnaıy keldi. Oblys ortalyǵy Taldyqorǵan qalasynyń tórindegi «Jastar» sport saraıynda Uly dala eliniń Batyry, Halyq Qaharmany, barsha Alash jurtynyń maqtanyshymen qaýyshýǵa jınalǵandardyń qatary mol boldy.
Qazaqstannyń kók baıraǵyn ǵarysh kóginde jelbiretip, aman-esen eline oralǵan ǵaryshkerdi Jetisýlyqtar atynan óńir basshysy Amandyq Batalov quttyqtady:
«Týǵan qalańyzǵa, jer jannaty Jetisý jerine qosh keldińiz! Qazaqtyń abyroıyn asyrǵan Sizdeı azamattyń Almaty oblysynda dúnıege kelip, bilim alyp, qyzmet jasaǵandyǵy - biz úshin úlken maqtanysh.
Sizdiń bala kezińizden ǵaryshker bolýdy armandap, Qazaq eliniń týyn ǵaryshqa alyp shyqsam degen balalyq armanyńyz oryndaldy. Ústimizdegi jyldyń ekinshi qyrkúıeginde bárimiz Sizdiń ǵaryshqa ushqan tarıhı sátińizge kýá boldyq, qatty qýandyq, erekshe tolqydyq. Kóptiń tilegi qabyl bolyp, aman-esen jerge oraldyńyz. Qarapaıym qazaq balasynyń armany oryndalyp, osy kúnde Uly dala eliniń maqtanyshyna aınaldyńyz. Keshe ǵana Elbasynyń Jarlyǵymen «Halyq qaharmany» ataǵyn tabystalyp, Aıdynnyń kosmos keńistiginde onnan asa ǵylymı-tájirıbelik synaqtar júrgizgenin erekshe atap ótti.
Sizdiń otandyq kosmos salasyn damytýdaǵy eńbegińiz - jastar úshin ónege. Sizdiń ǵaryshqa jasaǵan osy bir saparyńyz arqyly biz birlik pen erliktiń ne ekenin óskeleń urpaqqa kórsetip, Otandy qalaı súıý kerektigin úıretetin bolamyz», - dep sózin túıindedi.
Osydan keıin Taldyqorǵan qalasynyń ákimi Ermek Alpysov Aıdyn Aqanulyna Taldyqorǵan jurtshylyǵy atynan tilek-lebizin bildirip, «Taldyqorǵan qalasynyń qurmetti azamaty» ataǵyn berip, sý jańa temir tulpardyń kiltin syılady.
Óz kezeginde Aıdyn Aıymbetov: «Qurmetti jerlester! Ózderińizben amandyqta qaýyshqandyǵyma qýanyshtymyn. Meniń ǵaryshqa saparymnyń oıdaǵydaı bolýy birinshi kezekte Elbasynyń, odan keıin barsha jerlesterimniń arqasynda. Sol úshin barshańyzǵa úlken alǵysymdy bildiremin. «Qazǵaryshta» jumysymdy jalǵastyrý arqyly Qazaqstannyń ósip-órkendeýi jolynda áli talaı eńbek etetindigime sóz beremin», - dep sózin qorytty.
Shara oblystyń úzdik shyǵarmashylyq ujymdarynyń ázirlegen konserttik baǵdarlamasymen jalǵasty.
Osydan keıin Aıdyn Aıymbetov ózi bilim nárimen sýsyndaǵan № 14 orta mektepke baryp, bilim ordasynyń ujymymen júzdesti. Aq peıil men yntymaqtyń belgisi retinde mektep oqýshylary aspanǵa aq sharlardy ushyrý arqyly, ózderi oqyp jatqan mektep túlegine degen qýanysh sezimderin bildirdi. Ǵaryshkermen birge osy mektepke elimizdiń jan-jaǵynan Aıdyn Aıymbetovtyń synyptastary da jınaldy. Barlyǵy mektep qabyrǵasynda júrgen kezderin eske aldy.
Shara sońy Aıdyn Aıymbetovtiń kezinde basshylyq etken №21751 áskerı bólimine baryp, bólimniń jeke quramymen kezdesip, emen-jarqyn áńgimelesýimen aıaqtaldy.
Derekkóz: Qazaqparat
