ASTANA. QazAqparat - Búgin Almatydaǵy Ahmet Baıtursynov atyndaǵy Til bilimi ınstıtýtynda Halyqaralyq Túrki akademıasynyń kitaphanasyna kórnekti ǵalym Rabıǵa Syzdyqovanyń jeke kitap qoryn qabyldap alý rásimi bolyp ótti.
Jıynǵa ǵalymnyń ózimen birge Halyqaralyq Túrki akademıasynyń prezıdenti Darhan Qydyráli, A.Baıtursynov atyndaǵy Til bilimi ınstıtýtynyń dırektory Myrzabergen Malbaqov, belgili ǵalymdar Telqoja Januzaqov, Álimhan Júnisbek, Zeınep Bazarbaeva, Asqar Jubanov, Nurgeldi Ýálı, Rústem Shoıbekov, Babash Ábilqasymov, Jamal Mankeeva, Orynaı Jubaeva, sonymen qatar Rabıǵa Sátimǵalıqyzynyń shákirtteri men jas ǵalymdar qatysty.

Sanaly ǵumyryn til bilimi salasyna arnaǵan ǵalym, akademık, profesor Rabıǵa Syzdyqova 1500-ge jýyq kitaptan bólek, barlyq qoljazbalaryn, arhıvterden jınaǵan kóne basylymdar men qundy qoljazbalardyń fotokóshirmelerin de Akademıa kitaphanasyna tapsyrdy.  Aıta ketý kerek, Akademıa kitaphanasy byltyr belgili majar túrkitanýshysy Ishtvan Qońyr Mandokıdyń mol kitap qoryn qabyldap alǵan bolatyn. Sondaı-aq, qazaqstandyq belgili ǵalymdar Ábdýálı Qaıdar men Áljan Quryshjanulynyń da jeke kitap qorlary Halyqaralyq Túrki akademıasynyń kitaphanasyna tabys etilgen. Akademık, profesor Rábıǵa Syzdyqova sol ıgi dástúrdi jalǵastyryp otyr.

Akademıa basshysy bilikti ǵalym Rabıǵa Sátimǵalıqyzynyń túrki murasyna qamqorlyǵy men túrkologıa ǵylymynyń damýyna qosqan ólsheýsiz úlesi úshin alǵys aıtyp, Halyqaralyq Túrki akademıasynyń sertıfıkatyn tabys etti, dep habarlaıdy  Halyqaralyq Túrki akademıasynyń baspasóz qyzmeti. 

Derekkóz: QazAqparat