ALMATY. QazAqparat - Búgin Almatyda «Stýdent jastar arasynda jemqorlyqtyń aldyn alý: máseleler jáne olardyń sheshý joldary» atty taqyrypta konferensıa ótti. 
«Búgingi forýmnyń basty maqsaty - Elbasy usynǵan Ult Jospary - «100 naqty qadamdy» júzege asyrýǵa úles qosý. Iaǵnı, bul jerde jemqorlyq árekettermen qoǵam bolyp kúresýge jumylý. Bul stýdentterge de qatysty másele. Qazir kóptegen joǵary oqý oryndarynda jemqorlyqqa qarsy naqty sharalar júzege asyrylyp jatyr. Mysaly, sesıa kezinde oqý úderisin ashyq túrde ótkizý qolǵa alyndy. Iaǵnı, ol endi elektrondy formatta júrgiziledi. Bir sózben aıtqanda, bilim alý úderisine adal kózqaras qana jemqorlyqty joıýdyń kepili bola alady», -  dedi QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Almaty qalasy boıynsha departamentiniń bólim bastyǵy Maqsathan Anapın.

Onyń aıtýynsha, qazir joǵary oqý oryndarynda jemqorlyqqa qarsy kúreste aıtarlyqtaı oń ózgerister baıqalýda. Bıylǵy jyldyń basynan beri qalada  37 joǵary oqý ornynda stýdentterge jemqorlyqqa qarsy tálim-tárbıe berý kýrsy engizilgen.

Konferensıaǵa  QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Almaty qalasy boıynsha departamentiniń ókilderi  jáne qaladaǵy birqatar joǵary oqý oryndarynyń ustazdary men stýdentetteri qatysty.

Jıyn sońynda qoldaryna túrli-tústi shar ustaǵan stýdent jastar jemqorlyqqa qarsy flesh-mob uıymdastyrdy.

Derekkóz: QazAqparat