QYZYLORDA. QazAqparat - Qyzylorda oblysy býferlik aımaqtan shyǵýǵa tolyq daıyn, dep málim etti oblys ákiminiń orynbasary Serik Qojanıazov baspasóz máslıhatynda.
Reseı Federasıasy men Qazaqstan Respýblıkasynyń veterınarlyq qyzmetteriniń 2011 jylǵy 11 naýryzdaǵy sheshimine sáıkes aýsyl indetine qolaısyz Ózbekstan, Qyrǵyzstan, Qytaı memleketterine kórshiles Qazaqstannyń 5 oblysy býferlik aımaqqa jatqyzylyp, bul oblystardan elimizdiń basqa aımaqtary men Keden odaǵyna múshe memleketterge aýsylǵa beıim aýyl sharýashylyǵy janýarlary men olardyń shıki et ónimderin shyǵarýǵa tıym salynǵan bolatyn.
Sodan beri oblys aýmaǵyn býferlik aımaqtan shyǵarý maqsatynda birqatar jumystar atqaryldy. Bıylǵy jyldyń ózinde aýsyl indeti boıynsha bekitilgen josparǵa sáıkes, 480 bas maldyń qan quramyna júrgizilgen zerthanalyq zertteýler ońdy nátıje kórsetti.
Sondaı-aq, qazan aıynyń 8-11 aralyǵynda Halyqaralyq Epızootıalyq Búrosynyń bas dırektory Bernard Vall Astana qalasyna saparmen kelip, Premer-Mınıstr Kárim Másimovpen jáne QR Aýyl sharýashylyǵy mınıstri A.Mamytbekovpen kezdesken bolatyn. Júzdesý barysynda býferlik aımaqtaǵy 5 oblysqa vaksına qoldanylatyn aýsyldan taza aımaq statýsyn berý maqsatynda is-sharalar atqarylyp jatqandyǵy aıtylǵan edi. 2015 jylǵy 6 qarashada Almaty qalasynda ótetin İİİ-halyqaralyq veterınarlyq kongreste ǵylymı keńestiń oń sheshimi shyǵady dep kútilýde. Sodan keıin 2016 jyldyń mamyr aıynda Parıj qalasynda ótetin HEB-nyń 84-Assambleıa delegattarynyń qaraýyna usynylmaq.
- Jalpy, býferlik aımaqtan shyǵýǵa baılanysty talaptardyń barlyǵyn oryndap otyrmyz. Endi arnaıy ruqsat qaǵazdyń merzimin kútýdemiz, - dedi oblys ákiminiń orynbasary S.Qojanıazov.
Qyzylorda oblysynyń etti eksporttaýǵa áleýeti jetkilikti. Bul baǵytta jasalyp jatqan jumystar aýqymdy. Máselen, qazirgi tańda oblysta 2200 basty bordaqylaýǵa arnalǵan 18 alań bar. Sondaı-aq, Syrdarıa aýdanynda 3 myń basqa jáne Qazaly aýdanynda 500 basqa arnalǵan mal bordaqylaý alańy salynyp jatyr. Keler jyly Jalaǵash aýdanynda 3 myń basqa arnalǵan bordaqylaý alańynyń qurylysy bastalatyn bolady.
Derekkóz: Qazaqparat
