ASTANA. QazAqparat - Qyzylordadan shyqqan sportshy, Belgıadaǵy velosıped  Akademıasynyń negizin qalaǵan Andreı Kashechkın qazir jahandyq «Baıqońyr» jobasyn qolǵa aldy.   Andreı  Kashechkınniń aıtýynsha, jobanyń bir tarmaǵy Qazaqstannyń jańa velokomandasyn qurý bolsa, ekinshi baǵyty - Baıqońyr qalasyn álem týrıseri aǵylatyn ortaǵa aınaldyrý. 
«Bastama - jahandyq joba, bul joba aıasynda ««Baikonur team» degen velokomanda quryp, ony qazaqstannyń veloshabandozdarymen jasaqtaǵym keledi. Sonymen qatar, eldegi týrızmdi damytyp, Qazaqstannyń ımıjin nasıhattaý kózdelip otyr. Meniń oıymsha, Baıqońyr álem boıynsha ataqty qala, biraq, onyń qaı elde, Qazaqstannyń qaı oblysynda ornalasqanyn jaqsy bile bermeıdi. Mine, osy joba arqyly, jańa velokomanda arqyly Baıqońyrdy álemdik týrızmniń ortasyna aınaldyrǵym keledi», - deıdi A.Kashechkın.

«Baikonur team» velokomandasy qazir qurylyp jatyr, al, resmı tanystyrylymy 2016 jylǵa josparlanyp otyr.

«Jalpy, sporttyń qaı salasy bolmasyn, jańadan komanda qurý ońaı sharýa emes. Myqty sportshylardy taýyp, olardy komandaǵa tartý bir bólek te, komandany álemniń arenasyna shyǵarý óz aldyna úlken jumys. Júıeli tártippen, qajyrly eńbek arqyly ǵana komandany tanyta alamyz. Bir aıta keterligi, osy velokomandanyń negizgi quramy qazaqstandyq sportshylardan quralady, sebebi, legıonerlerge ǵana úmit artý qıyn bolady. Sporttaǵy tártip boıynsha, legıonerler kelisimshart bitken soń, komandany tastap kete beredi, al Olımpıada oıyndary nemese Álem chempıonattaryna Qazaqstannyń óz sportshylary upaı jınaý kerek»,-deıdi A.Kashechkın.

Ázirge, «Baıqońyr» jobasy Ispanıanyń ESCATO GROUP jáne Monakonyń CASPIAN SERVICES kompanıalarymen áriptestik ornatqan. Qyzylorda oblysynyń ákimdigi men «EXPO-2017» kompanıalarymen kelissózder júrip jatyr.

Derekkóz:QazAqparat