ORAL. QazAqparat - Batys Qazaqstan oblysynda bıylǵy densaýlyq saqtaý búdjeti 22,2 mlrd. teńgege (ótken jyly - 21,9 mlrd. teńge) jetse, sonyń ishinde respýblıkalyq búdjetten - 14,2 mlrd. teńge, jergilikti qazynadan 8,0 mlrd. teńge bólinip otyr.
Oblystyq densaýlyq saqtaý basqarmasynyń basshysy Qamıdolla Irmenovtiń aıtýynsha, bıylǵy toǵyz aıǵa qarastyrylǵan 16,3 mlrd. teńge tolyqtaı ıgerildi. «100 mektep, 100 aýrýhana» baǵdarlamasy aıasynda Oralda 300 tósektik qalalyq kópbeıindi aýrýhana qurylysy aıaqtalyp keledi. Jobanyń jalpy quny - 8,3 mlrd. teńge.

Qazirgi tańda óńirde 631597 adamǵa 422 densaýlyq saqtaý nysany (sonyń 385-i aýyldyq jerde) medısınalyq qyzmet kórsetedi.

Ótken jyldyń osy kezeńimen salystyrǵanda, bıylǵy toǵyz aıda áleýmettik kesel bolyp sanalatyn birqatar aýrý boıynsha oń nátıjege qol jetkizildi. Atap aıtqanda, týberkýlezben syrqattanýshylar 6,4 paıyzǵa (100 myń adamǵa  shaqqanda 40,8-den 38,2-ge), osy dertten ólim-jitim 16,7 paıyzǵa (100 myń adamǵa shaqqanda 3,0-den 2,5-ke deıin) tómendedi. Erte satydaǵy qaterli isikterdi anyqtaý kórsetkishi 2,6 paıyzǵa joǵarylap, 56,3 paıyzdy (2014 jyly - 54,9 paıyz) qurady. Soǵan baılanysty qaterli isikten kóz jumǵandar 5,7 paıyzǵa (100 myń adamǵa shaqqanda 71,9-dan 67,8-ge deıin) azaıdy. Jaraqattar men ýlanýdan ólim kórsetkishi de 7,3 paıyzǵa (64,1-den 59,4-ke) kemigen.

Oblysta aýrýdy erte anyqtaý maqsatynda 274659 adam nemese óńir halqynyń 43,5 paıyzy skrınıngtik zertteýmen qamtylyp, solardyń ishinen 3,4 paıyzynan (9362) bastapqy aýrý belgileri anyqtaldy. Osynyń 99,5 paıyzy (9316) esepke qoıyldy.

Naýqastardy dári-dármekpen qamtýǵa respýblıkalyq jáne jergilikti búdjetten 3,5 mlrd. teńge bólindi. Bul 81 myńnan astam adamdy tegin dári-dármekpen qamtýǵa múmkindik berdi.

Bıyl 2011-2015 jyldarǵa arnalǵan «Salamatty Qazaqstan» baǵdarlamasy márege jetip, aldaǵy jyldan 2016-2019 jyldarǵa arnalǵan «Densaýlyq» baǵdarlamasy júzege asyryla bastaıdy.  Elbasymyzdyń «Nurly jol - bolashaqqa barar jol» atty Joldaýynda atap kórsetilgenindeı, densaýlyq saqtaýdy damytý baǵytyndaǵy jumystar jalǵasyn taba beredi.

Aıta keteıik, óńirde 1564 dáriger (10 myń turǵynǵa - 25,2), 5693 orta býyn medısına qyzmetkeri (10 myń turǵynǵa - 90,1) qyzmet etedi. Bıyl BQO-ǵa 87 jas maman kelse, sonyń 52-si aýyldyq jerlerge jiberildi. Sondaı-aq ózge oblystardan 6 maman qonys aýdardy. 

Derekkóz:QazAqparat