ALMATY. QazAqparat - Turǵyn úı qurylys jınaq banki depozıttegi somasy 1 mln teńgeden asatyn salymshylarǵa ótemaqyny óz tabysynyń 35%-ynan bólýdi sheshti.
 Bul málimdemeni  búgin «Turǵyn úı qurylys jınaq banki» AQ basshylyǵy búgin ótken baspasóz máslıhaty barysynda málim etti.

Bank basshylyǵynyń aıtýynsha, bankte qazir depozıt somasy 1 mln teńgeden asatyn 57 myń kelisim bar. Kelisimderdiń jalpy quny 114 mlrd teńge. Ótemaqynyń jalpy kólemi 40 mlrd teńge boldy. Al, 1 mln teńgege jetpeıtin salym boıynsha 435 myń kelisim bar. Olarda 66 mlrd teńge saqtalǵan.

Bul salymshylardyń teńge baǵamynyń ózgerisinen kórgen shyǵyny QR Ulttyq bank sqemasy boıynsha óteletin bolady. Ótemaqyǵa jalpy 20,9 mlrd teńge bólinedi.

«Turǵyn úı qurylys jınaq banki» AQ basqarma tóraǵasynyń orynbasary Erbol Qarashúkeevtiń aıtýynsha, bank iri salymshylardyń shyǵynyn óteýge óz tabysynyń 35 paıyzyn baǵyttaýdy usynyp otyr.

«Tamyzdyń 18-inen 20-syna deıingi aralyqtaǵy kýrs saqtalady. Mıllıon teńgeden az salymdarǵa kelsek, shotynda úsh myń teńge bar salymshylar ótemaqy talap etpes úshin eń mınımaldy kýrs baǵamyn alamyz», - dedi E.Qarashúkeev.

Aıta ketý kerek, ótemaqy tóleý tetikteri týraly joba qazir QR Úkimetiniń qaraýynda jatyr. Joba bekitilgen soń bank barlyq salymshylarǵa aqparat beretin bolady. Sondaı-aq, klıentter úshin e-gov portalynda onlaın rejimde ótinish berý úshin qyzmet túri ashyldy. Ótemaqy alý úshin qosymsha shot ashýdyń qajeti joq. Aıyrbas baǵamy depozıt jyl boıy saqtalǵan jaǵdaıda shotqa aýdarylady.

Buǵan deıin banktiń jekemenshikke beriletini jaıly habarlanǵan edi. 

Jyldyń sońyna deıin Úkimet pen «Báıterek» holdıńi bank aksıasy paketiniń bir bóligin jekeshelendirý boıynsha eń ońtaıly jospar jasap shyǵarmaq.

Qazir bankte 552 889 salymshymen kelisim bar. Bul depozıtterde 280 mlrd teńge saqtalyp otyr.