KÓKSHETAÝ. QazAqparat - Kókshetaýda aǵartýshy-pýblısıst, saıahatshy-geograf, etnograf, ádebıet zertteýshisi Shoqan Ýálıhanovtyń 180 jyldyǵyna arnalǵan saltanatty sharalar ótýde.
Aqmola oblysy ákimdiginiń qoldaýymen «Shoqan joldary» qoǵamdyq birlestigi uıymdastyryp otyrǵan sharaǵa sonaý Qytaı memleketinen, elimizdiń Astana, Almaty, Pavlodar, Semeı, Qyzylorda, Túrkistan qalalarynan kelgen shyǵarmashylyq, ǵylymı ıntellegensıa qatysyp jatyr.
Tańsáriden «Meniń Qazaqstanym» sáýlet kompozısıasynyń mańyna jınalǵan stýdentter men oqýshylar qaýymy qalanyń basty kóshelerimen jaıaý júgirip ótse, Shoqan Ýálıhanovtyń Kókshetaýdaǵy eskertkishiniń mańyna da aǵaıyn kóptep kelip, gúl shoqtaryn qoıdy.
Eskertkish aldynda Shoqan Ýálıhanov atyndaǵy Kókshetaý memlekettik ýnıversıtetiniń rektory, tehnıka ǵylymdarynyń doktory Ábdimútálip Ábjapparov, Shákárim atyndaǵy Semeı memlekettik ýnıversıtetiniń dosenti, fılosofıa ǵylymdarynyń kandıdaty Erzat Jetibaev quttyqtaý sóz sóılep, daryndy tulǵanyń eline sińirgen zor eńbegi, ǵylym, saıahatshylyq joly týraly tebirene baıandap berdi.
Mereıtoılyq sharalar legi odan ári Sh.Qusaıynov atyndaǵy qazaq mýzykalyq-drama teatrynda jalǵasyn tapty. Munda kópshilik «Ótkendi oılap búgingi kúnniń qamyn jeý» degen taqyryppen Shoqannyń eńbekteri, ol jaıly jazylǵan kitaptar qoıylǵan kórmeni tamashalady. Al, teatrdyń kórermender zalynda ótken negizgi kezdesýdi fılosofıa ǵylymdarynyń doktory, profesor Raýshan Kóshenova júrgizip otyrdy.
QR eńbek sińirgen ártisi, jeztańdaı ánshi Bısara Mákenova Shoqannyń toıyna shashý retinde alyp kelgen «Abylaı» ánin dombyrada oryndap berse, aqyn apaıymyz Shámshıa Aıtjanova jyrdan shashý shashty.
Sharaǵa Qytaıdan at terletip kelgen qonaǵymyz, Qytaı radıosynyń aǵa dıktory Jibek Bazarbaıqyzy kezinde Shoqan Ýálıhanovtyń tabany tıgen Qulja ólkesi búginde Qytaı qazaqtarynyń kıeli shańyraǵyna aınalǵanyn aıta kele, kókshelikterge shette júrgen qandastarymyzdyń sálemin jetkizdi.
Halyqaralyq deńgeıdegi marafonshy, alpys segiz jastaǵy jelaıaq sportshy Ámengúlsim Musylmanovanyń aq tilekterine de zalda otyrǵan jurtshylyq razy boldy.
Oblystyq ishki saıasat basqarmasynyń bólim basshysy Asylbek Baıajuma Shoqannyń baı murasyn halyqqa jetkizýde, ásirese ony jastarǵa úıretý isine zor úles qosyp kele jatqany úshin profesor Raýshan Kóshenovaǵa oblystyq ákimdiktiń Alǵys hatyn saltanatty jaǵdaıda tabys etti.
Sondaı-aq, bul kezdesýde «Jyl Shoqany» baıqaýy jeńimpazynyń da esimi atalyp, kópshilik nazaryna osy baıqaý qatysýshylary daıyndaǵan beınebaıan kórsetildi.
