TARAZ. QazAqparat - Tarazda Shensı provınsıasynyń Sıan qalasynan Uly Jibek joly baǵytymen Tarazǵa kele jatqan kerýen ekspedısıasyn saltanatty túrde qarsy alýǵa daıyndalyp jatyr.
Eske sala keteıik, 2014 jylǵy 19 qyrkúıekte Sıannan ejelgi saýda jolymen «Qytaı - Qazaqstan: Uly Jibek jolynyń shaı mádenıeti» dostyq jáne yntymaqtastyq kerýeni shyqty.
Tarazda jergilikti jáne respýblıkalyq BAQ ókilderine arnalǵan baspasóz-konferensıasynda Jambyl oblysy ákiminiń orynbasary Erqanat Mánjýov aıtqandaı, kerýendegi bastapqyda aıtylǵan túıelerdiń sany edáýir azaıǵan.
«Kerýen quramynda 136 túıe, 20 jylqy, 4 arba, 11 avtomobıl bolǵan. Qazir túıelerdiń sany edáýir azaıdy - 55. Bul tıisti sanıtarlyq talaptarǵa sáıkes shekaradan ótkizbeýine baılanysty», - dep túsindirdi ol.
«Osy senbide kerýendi Jambyl oblysynyń shekarasynda Qordaı aýdanynda qarsy aldyq. Jýyrda olardyń Tarazǵa kelýin kútemiz.
6 qazanda qala turǵyndary men qonaqtaryn «Tórtkúl» kerýen-saraıyna shaqyramyn, munda Tuńǵysh Prezıdent saıabaǵyna deıin sherý bolyp, Aspanasty eliniń ókilderin qarsy alamyz. Teatrlandyrylǵan qoıylym ótedi. Bul qalalardyń merleri keledi dep kútemiz. Olar ádeıi kerýendi bir kúnge keshiktirýdi suraǵan», - dedi E. Mánjýov.
«Qytaı - Qazaqstan: Uly Jibek jolynyń shaı mádenıeti» aýqymdy aksıasy Jibek jolynyń ekonomıkalyq beldeýin qurý ıdeıasyn qoldaý maqsatynda ótip jatyr. Kerýendi Tań dınastıasy dáýiriniń kıimderin kıgen kerýenshiler, naızaly qaraýyldar, jylqyǵa jegilgen arbalar men avtomobılder sherýi súıemeldeıdi. Kerýen Shensı provınsıasynda ósiriletin fýsa emdik shaıyn ákele jatyr
Qashyqtyǵy 5 myń shaqyrymnan asatyn saıahatty uıymdastyrýǵa Qazaqstannyń dúngen qaýymdastyǵy men «I-Ze Fýsa» kompanıasy (Sıan, Qytaı) bastamashy boldy. Halyqaralyq ekspedısıanyń qazaqstandyq bóliginiń bas operatory Almaty oblysy kásipkerler palatasy men «Jańa Jibek joly» mádenı jáne ekonomıkalyq yntymaqtastyq halyqaralyq akademıasy» QQ. Shara uıymdastyrýshylary - Sıan qalasynyń ákimshiligi, Almaty jáne Jambyl oblystarynyń, Almaty qalasynyń ákimdikteri.
