El úkimeti 2026 jylǵy sýarý maýsymyna «qara» senarı ázirlep jatyr. Syrdarıa alabynda sý 3,2 mlrd tekshe metrge deıin kemip, ońtústiktegi egin men qala qajettiligi qysymǵa túsýi múmkin.
Negizgi kórsetkishter
13 qańtarda ótken Úkimet otyrysynda Sý resýrstary jáne ırrıgasıa mınıstri Nurjan Nurjigitov pesımısik boljamdy tanystyrdy. Mınıstr málimetinshe, Syrdarıanyń joǵarǵy aǵysynda, kórshi elder aýmaǵyndaǵy sý qoımalarynda jınaqtalǵan sý kólemi ótken jyldyń osy ýaqytymen salystyrǵanda 3,2 mlrd m³ az tur. Qazaqstannyń ońtústik óńirlerindegi qoımalarda da sý 1,9 mlrd m³ tómen tur (12 qańtar 2026 jylǵy derek boıynsha).
Aldaǵy vegetasıalyq kezeńde ońtústiktegi ózenderge keletin sý aǵyny aıtarlyqtaı qysqarady dep kútiledi, dep habarlady mınıstrlik.
Sebebi nede?
Kúz-qys maýsymynda jaýyn-shashyn azaıdy, muzdyqtardan keletin aǵyn tómendedi, al klımattyń ózgerýi úrdisti kúsheıtti. Bul – bir maýsymnyń emes, uzaq merzimniń belgisi, sondyqtan beıimdelý sharalaryn júıeli túrde kúsheıtý qajet dedi mınıstrlik.
Úkimettiń jospary qandaı?
2026 jylǵy sýarý maýsymyna daıyndyq bastaldy. Oroshenıe arnalary men gıdrotehnıkalyq nysandarda jóndeý-qalpyna keltirý jumystary júrip jatyr, agrarıılermen kezdesýler ótip jatyr. Fermerlerge sý únemdeý tásilderin engizý jáne sýǵa talaby tómen daqyldarǵa birtindep kóshý usynylyp jatyr.
Aqpanda sý resýrstary vedomstvosy sý kelimi eń tómen senarımen eseptelgen sý paıdalaný lımıtterin naqtylap shyǵarady. Naýryzda Aýyl sharýashylyǵy mınıstrligi sý jaǵdaıyna qaraı egis qurylymyn túzetedi.
Baqylaý jáne zańsyz sý alýǵa tosqaýyl
Sýdy ruqsatsyz burýǵa jáne ysyrapqa jol bermeý úshin Bas prokýratýramen birlesken jospar ázirlendi. Quqyq qorǵaý jáne ózge de memlekettik organdar kiretin respýblıkalyq vedomstvoaralyq jumys toby qurylmaq.
Kontekst: ótken jazdyń sabaǵy
Túrkistan oblysynyń Sozaq aýdanynda ótken jazda qýańshylyq saldarynan sharýalar jappaı mal joǵaltty, jem-shóp baǵasy sharyqtady. Mundaı qýańshylyqty jergilikti jurt sońǵy 35 jylda kórmegenin aıtty.
2025 jyly Ekologıa jáne tabıǵı resýrstar mınıstri Erlan Nysanbaev Qostanaıdyń ońtústigi, Batys Qazaqstan, Mańǵystaý, Qyzylorda, Almaty, Jambyl, Qaraǵandy jáne Aqtóbe, Atyraý, Abaı, Túrkistan oblystarynyń keı aýmaqtarynda qýańshylyq qaýpi joǵary ekenin eskertken. «Qazgıdromet» temperatýra ósýi men jaýyn-shashyn sıpatynyń ózgerýi saldarynan, ásirese ońtústik pen batysta qýań qubylystar jıileıtinin málimdegen.
Bul týraly Qamshy.kz aqparat agenttigi habarlaıdy.
