«Qazaqmys korporasıasy» JSHS Sıfrlandyrý qyzmeti Balqash telekomýnıkasıa ortalyǵynyń burynǵy jetekshi ınjeneri Ádil Aǵybaev Prezıdentke, memlekettik organdarǵa, BAQ pen qoǵamǵa úndeý joldady. Osy kásiporynda 21 jyl eńbek etken ol birneshe jyldan beri jalǵasyp kele jatqan jaǵdaıǵa arasha túsýdi suraıdy.

Aǵybaevtyń málimdeýinshe, 2023 jyly korporasıa basshylyǵy ony jáne taǵy úsh qyzmetkerdi zańsyz jumystan shyǵarǵan. Jumysshylar sotqa júginip, jumystan shyǵarýdyń zańsyz bolǵanyn dáleldep shyǵady, sodan keıin olar qaıtadan jumystaryna ornalasady.
Alaıda, burynǵy ınjenerdiń aıtýynsha, jumysqa qaıta oralǵannan keıin qyzmetkerlerge únemi qysym kórsetile bastaǵan. Ol áriptesteriniń biri mundaı psıhologıalyq qysymǵa shydamaı qaıtys bolǵanyn, al qalǵandary jumystan óz erkimen ketip, basqa jumys izdeýge májbúr bolǵanyn alǵa tartady.

2026 jyly, Aǵybaevtyń aıtýynsha, ony taǵy da jumystan shyǵarǵan – bul joly shtatty qysqartý syltaýymen. Onyń ústine, kompanıanyń ishki qujattaryn zertteý barysynda jańa uıymdyq qurylym týraly negizgi buıryqta qyzmetkerlerdi qysqartý jóninde eshqandaı málimet joq ekeni anyqtalǵan. Onyń pikirinshe, qyzmetkerlerdi jumystan shyǵarmaı, basqa laýazymdarǵa aýystyrý kerek bolǵan.

Budan bólek, Aǵybaev ózin jumystan shyǵarýǵa qatysty buıryqtaǵy óz qolynyń qoldan qoıylǵanyn (qoltańbanyń qoldan jasalǵanyn) málimdedi.
Burynǵy ınjenerdiń sózine súıensek, sıfrlandyrý qyzmetiniń 700-ge jýyq qyzmetkeriniń ishinen tek ony ǵana qysqartqan. Sonymen qatar, ol óz laýazymynyń naqty joıylmaǵanyn aıtady – onyń ornyna Astanadan jańa qyzmetker qabyldanǵan, biraq jumys orny Balqash qalasynda ornalasqan. Aǵybaev jańadan kelgen qyzmetkerdiń bul orynda naqty jumys istep jatqanyna kúmán keltiredi.