Shalkóde jaılaýynda Raıymbek aýdanynyń 90 jyldyq mereıtoıyna arnalǵan «Hantáńiri qazynasy» halyqaralyq etnofestıvali bastaldy. Mereıtoı aıasynda 150-ge jýyq aqshańqan kıiz úı tigilip, túrli taqyryptar boıynsha kórmeler uıymdastyryldy. Onda otandyq jáne halyqaralyq qolónershiler men etnodızaınerlerdiń, qylqalam sheberleriniń úzdik týyndylary, ulttyq taǵamdar men aýyl sharýashylyǵy ónimderi halyq nazaryna usynyldy. Ulttyq sport túrlerinen saıystar ótip, kil myqtylar ózara synǵa túsýde. Mádenı-kópshilik is-sharaǵa Qytaı, Túrkıa, Reseı, Ázirbaıjan, Qyrǵyzstan, Tájikstan, Belarýs, Armenıa, Ózbekstan, Grýzıa elderinen, Qazaqstannyń túkpin-túkpirinen qonaqtar aǵylyp kelip, ulan-asyr toıdyń kýási bolýda, – dep habarlaıdy Almaty oblysy ákiminiń baspasóz qyzmeti.
Halyqaralyq festıválde Raıymbek aýdanynyń tarıhı damý joly men áleýmettik-ekonomıkalyq jetistikteri tanystyryldy. Aýmaly-tókpeli zamanda eldiń qaýipsizdigin kúzetken Raıymbek batyrdyń erlik isteri dáripteldi. Asqar shyńdy Hantáńiri baýraıynan túlep ushqan Berdibek Soqpaqbaev, Muqaǵalı Maqataev, Erkin İbitanov, Saǵat Áshimbaev, Altynbek Sársenbaev jáne Orazaly Dosbosynov syndy birtýar tulǵalardyń ónegeli ómir joly nasıhattaldy. Dala mádenıetin aıshyqtaıtyn, qazaq halqynyń qasıetti «Qarqaraly» jaılaý kóshi kórermendi tarıhtyń tereń qoınaýyna sapar shektirdi. Máni men sáni kelisken saltanatty kósh kóshpeli eldiń salt-dástúri men mádenıetinen syr shertip, bereke men birliktiń jarshysyna aınaldy. Shetelden kelgen sheberlerdiń sherýi de halyqtyń erekshe nazaryna ilikti.
Sharaǵa QR Prezıdentiniń keńesshisi Málik Otarbaev ta qatysyp, Memleket basshysy Qasym-Jomart Toqaevtyń quttyqtaýyn jetkizdi.
«Raıymbek – tarıhy tereń, yntymaǵy jarasqan berekeli óńir. Osy ónegeli ólkeden kóptegen tuǵyrly tulǵalar shyǵyp, ult múddesi úshin qaltqysyz qyzmet etti. Qazir aýdan halqy aýyl sharýashylyǵy, týrızm jáne basqa da salalarda qajyrly eńbek etip, týǵan jerin kórkeıtýge atsalysyp keledi. Sondaı-aq olar el taǵdyryna áser etetin bastamalardy únemi qoldap, uıymshyldyqtyń ozyq úlgisin tanytyp júr. Aýdan turǵyndarynyń jalpyhalyqtyq referendýmǵa belsene qatysyp, Jańa Konstıtýsıany qoldaýy – sonyń aıqyn dáleli. Osy oraıda, aımaqty damytýǵa zor úles qosqan azamattardyń bárine shynaıy rızashylyǵymdy bildiremin. Sizder aldaǵy ýaqytta da el ıgiligi úshin eńbek ete beresizder dep senemin», – delingen quttyqtaý hatta.
Oblys ákimi Marat Sultanǵazıev óz sózinde qut qonǵan, yrys uıalaǵan Narynqol óńiri halqymyzdyń rýhanı murasy men tarıhı jadynyń ajyramas bóligi ekenin aıtty.
«Bul – eli úshin týǵan Raıymbek batyrdyń, Uzaq pen Jámeńkeniń erligi órilgen kıeli meken. Ulttyq rýhtyń besigine aınalǵan osy topyraqtan qazaq mádenıeti men ádebıetiniń talaı biregeı tulǵalary túlep ushty. Balalar ádebıetiniń klassıgi Berdibek Soqpaqbaevtyń 100 jyldyq mereıtoıynyń IýNESKO deńgeıinde atalyp ótýi – osy óńirden shyqqan uly tulǵalardyń murasy halyqaralyq deńgeıde moıyndalǵanynyń aıǵaǵy. Qazaq poezıasynyń Hantáńiri Muqaǵalı Maqataevtyń jyrlary – ultymyzdyń sarqylmas asyl qazynasy. Sol ulylyqtyń izin ala, sóz óneriniń týyn jyqpaı ilgeri súıregen synshy Saǵathan Áshimbaev pen jazýshy-dramatýrg Baqqoja Muqaı da osy topyraqtyń perzentteri. Al aıtys óneriniń aıtýly ókilderi Erkin İbitanov pen Orazaly Dosbosynov qazaqtyń sóz qudiretin asqaqtatyp, tól ónerimizdiń mereıin ústem etti. Munymen qosa, bul qutty meken ult múddesi jolynda aıanbaı eńbek etken, el basqarǵan saıası jáne qoǵam qaıratkerlerin de dúnıege ákeldi. Osyndaı taý tulǵalardy qalyptastyrǵan Raıymbek aýdany – el rýhanıatynyń altyn arqaýy bolyp qala beredi», – dedi aımaq basshysy.
Sondaı-aq Memleket basshysy Qasym-Jomart Toqaevtyń aýyldyq aımaqtardy, strategıalyq mańyzy joǵary shekaralyq óńirlerdi damytýǵa, halyqtyń turmys sapasyn arttyrýǵa árdaıym erekshe basymdyq beretinin aıtyp, osy baǵytta Raıymbek aýdanynda da júıeli jumystar júrgizilip jatqanyn jetkizdi. Aıtýynsha, tabıǵı baılyǵy men tarıhı murasyn saqtaı otyryp, aýdan áleýmettik-ekonomıkalyq damýdyń jańa kezeńine nyq qadam basyp keledi. Óziniń agrarlyq áleýetimen elimizdiń azyq-túlik qaýipsizdigin qamtamasyz etýge, oblys ekonomıkasyn órkendetýge zor úles qosýda. Raıymbektiń brendine aınalǵan kartop sharýashylyǵy men dándi-daqyldar óndirisi, mal sharýashylyǵy – otandyq ónimniń altyn standartyna aınalyp otyr.
«Aýmaqtyń týrısik áleýeti de óte joǵary. Hantáńiri shyńy, tunyq Tuzkól men Tastaý kólderi, Shalkóde jaılaýy bul ólkeni elimizdegi eń kórkem óńirlerdiń birine aınaldyrdy. Osynaý qaıtalanbas tabıǵat baılyǵy trekkıng, álpınızm, etnotýrızm jáne ekologıalyq týrızmdi damytýǵa keń jol ashady. Narynqol óńiriniń osynaý ekologıalyq taza týrısik múmkindikteri aldaǵy ýaqytta halyqtyń ál-aýqatyn kóteretin, aımaq ekonomıkasyn órge súıreıtin negizgi qozǵaýshy kúshke aınalýy tıis», – dedi oblys ákimi.
Aıta keteıik, Raıymbek aýdanynyń mereıtoıyna arnalǵan sharalar legi úsh kún boıy Táńirtaý tósin dýmanǵa bóleýde. 90 jyldyqqa oraı Qarasaz aýylynda «Qulmambettiń qulynyn qundaqtaǵan ólke» atty aıtysker aqyn Orazaly Dosbosynovty eske alýǵa arnalǵan II respýblıkalyq oqýshylar aıtysy uıymdastyryldy. Narynqol aýylynda aqıyq aqyn Muqaǵalı Maqataevtyń shyǵarmashylyǵyna arnalǵan aqyn-jazýshylardyń qatysýymen ǵylymı-tanymdyq konferensıa ótkizildi. Sondaı-aq aýdan ortalyǵynda oblys ónerpazdary men elimizdiń tanymal estrada juldyzdarynyń qatysýymen ótken gala-konsert turǵyndar men qonaqtarǵa merekelik kóńil-kúı syılady. Úsh kúndik dýman búgin Shalkóde jaılaýynda qorytyndylanady. Mereıtoı aıasynda sondaı-aq «Jolan júırigi» respýblıkalyq at báıgesi men ulttyq sport túrlerinen jarystar ótedi. Básekeniń júldesi de qomaqty. Shara qorytyndysynda tabıǵattyń tazalyǵyn saqtap, ekologıalyq mádenıetti qalyptastyrý maqsatynda «Taza Qazaqstan» baǵdarlamasy aıasynda senbilik ótkizilmek.
