Memleket basshysy Qasym-Jomart Toqaev Raıymbek aýdanynyń 90 jyldyq mereıtoıyna oraı turǵyndarǵa quttyqtaý joldady. Ony Shalkóde jaılaýynda ótken «Hantáńiri qazynasy» halyqaralyq etnofestıvaliniń saltanatty ashylýynda QR Prezıdentiniń keńesshisi Málik Otarbaev jetkizdi.

Prezıdent quttyqtaýynda osy qasıetti mekennen el múddesine adal qyzmet etken kóptegen kórnekti tulǵalardyń shyqqanyna toqtalyp, búginde aýdan halqy elimizdiń aýyl sharýashylyǵy, týrızm jáne ózge de salalarynyń damytýǵa eleýli úles qosyp kele jatqanyn atap ótken.

«Raıymbek – tarıhy tereń, yntymaǵy jarasqan berekeli óńir. Osy ónegeli ólkeden kóptegen tuǵyrly tulǵalar shyǵyp, ult múddesi úshin qaltqysyz qyzmet etti. Berdibek Soqpaqbaev, Muqaǵalı Maqataev jáne ózge de kórneki qalamgerler shoqtyǵy bıik shyǵarmalar jazyp, óskeleń urpaqtyń boıyna otanshyldyq, bilimpazdyq, eńbekqorlyq qasıetterin sińirdi.

Qazir aýdan halqy aýyl sharýashylyǵy, týrızm jáne basqa da salalarda qajyrly eńbek etip, týǵan jerin kórkeıtýge atsalysyp keledi. Sondaı-aq olar el taǵdyryna áser etetin bastamalardy únemi qoldap, uıymshyldyqtyń ozyq úlgisin tanytyp júr. Aýdan turǵyndarynyń jalpyhalyqtyq referendýmǵa belsene qatysyp, Jańa Konstıtýsıany qoldaýy – sonyń aıqyn dáleli», – delingen quttyqtaý hatta. 

Memleket basshysy sondaı-aq óńirdiń damýyna úles qosyp júrgen barlyq azamatqa rızashylyǵyn bildirip, aýdan turǵyndaryna baq-bereke, tolaǵaı tabys jáne el ıgiligi jolyndaǵy eńbekterine tabys tilegen.

Aıta keteıik, Raıymbek aýdanynyń 90 jyldyǵyna arnalǵan sharalar legi úsh kún boıy jalǵasty. Mereıtoı aıasynda ǵylymı-tanymdyq konferensıalar, respýblıkalyq aıtys pen konserttik baǵdarlamalar uıymdastyryldy. Ulan-asyr toı Shalkóde jaılaýynda «Hantáńiri qazynasy» halyqaralyq etnofestıvalimen qorytyndylandy.