Astanada Reseıdiń Bas prokýrory Áblázovti ekstradısıalaýǵa qatysty pikirin aıtty. Bul týraly «Qamshy» portaly  Tengrinews.kz-ke silteme jasap habarlaıdy. 

"Ol Qazaqstanǵa ekstradısıalanǵaly jatqan joq. Eger ol ekstradısıalanatyn bolsa, tek Reseı Federasıasyna. Biz kóp nárse istedik, sottyń barlyq ınstansıasynan óttik. Bizdiń pozısıamyz Áblázovti Reseıge ekstradısıalaý boldy. Bizdiń pozısıany Fransıa úkimeti qoldady. Qazir Memlekettik keńes deńgeıinde saıası sheshim bolýy kerek. Eger ondaı sheshim shyqsa, ol Reseıge ekstradısıalanady. Oǵan Reseı Federasıasynda aıyp taǵylady. Ol Reseı aýmaǵynda qylmys jasady: birneshe mıllıard dollardy jymqyrdy - RF qarjysyn", - dep jaýap berdi Tengrinews.kz tilshisiniń suraǵyna Iýrıı Chaıka sybaılas jemqorlyqqa qarsy áreket memleketaralyq keńesi otyrysynyń kýlýarynda.

Otyrys búgin Astanada Qazaqstan, Reseı men Belarýs quqyq qorǵaý organdarynyń qatysýymen ótti.

Eske sala keteıik, buǵan deıin BTA banktiń burynǵy basshysy Muhtar Áblázovtiń Reseıge ekstradısıalanatyny jáne mundaı sheshimdi Fransıa sotynyń qabyldaǵany habarlanǵan bolatyn. Eks-bankırdi Reseıge ekstradısıalaý týraly qujatqa 17 qyrkúıekte Fransıanyń premer-mınıstri Manýel Váls qol qoıdy. Áblázov bul sheshimge joǵary ákimshilik ınstansıa - Fransıanyń memlekettik keńesinde shaǵym keltirýge quqyly. Keıin Qazaqstannyń Bas prokýratýrasy Áblázovti Reseıden nemese Ýkraınadan qaıta ekstradısıalaý jóninde eshqandaı kelissózderdiń júrgizilip jatpaǵanyn málimdedi.