DAISH ekstremıstik uıymynyń sodyrlary qoqan-loqy kórsetip, kezekti vıdeony taratty. Bul týraly «Qamshy» portaly tengrinews.kz-ke siltema jasap habarlaıdy.

Sodyrlardyń úndeýi jazylǵan vıdeony Fox News telearnasy taratty.

Ol vıdeoda lańkester AQSH-tyń Aq úıin jaryp jiberýge nıetti ekenderin aıtady.

Telearnanyń málimetinshe, vıdeoda eki er adam AQSH-qa qoqan-loqy tanytyp, "Fransıa birinshi boldy, Vashıngton kelesi bolady", dedi. Telearna sol vıdeo fragmentteriniń birin kórsetti. Bul kadrdan saqaldy er adamdy kórýge bolady, qolynda avtomaty bar. Ol AQSH-qa úndeý salyp, Aq úıdi jaratyndaryn aıtty. Telearnanyń málimetinshe, mátindi Taıaý Shyǵys boıynsha amerıkalyq mamandar aǵylshyn tiline aýdarǵan.

Sonymen qatar, telearna bul vıdeonyń túpnusqalylyǵynyń tekserilip jatqanyn habarlady. 

Eske sala keteıik, 14 qarashaǵa qaraǵan túni Parıjde belgisiz bireýler eń aldymen qaladaǵy meıramhanalardyń birine shabýyl jasady. Sonymen qatar, Fransıa-Germanıa machy ótip jatqan "Stad de Frans" stadıonynyń mańynan da jarylystyń dybysy estildi. Lańkester "Bataklan" teatrynda adamdardy kepilge aldy. Sońǵy derek boıynsha, 129 adam qaza taýyp, 300 adam jaraqattandy. Jeti lańkestiń kózi joıyldy. Polısıa qylmysqa qatysy barlar men uıymdastyrýshylardy izdestirip jatyr.