«Qazaqstan» ulttyq arnasynda «Qazaqstan daýysy» baıqaýynyń bastalǵanyna kóp boldy. El ishinen ónerli jastardy tanytýdy maqsat etken baıqaýdyń osy kúnge deıin birneshe kezeńi ótip te úlgerdi. Bıylǵy kezeńi de tartysty ótýde. Oǵan elimizdiń ár túpkirinen, kórshiles elderden de ónerli jastarymyz qatysyp baǵyn synaýda. Solardyń biri – Seıit Saýataıulymen bolǵan shaǵyn suhbatty nazarlaryńyzǵa usynamyz.

-Serik, qadamyńa nur jaýsyn deımiz. Bul baıqaýǵa qatysýǵa qashannan beri talpynyp ediń?

- «Qazaqstan daýysy» jobasy alǵash bastalǵan jyly-aq osy baıqaýda baq synap kórý meniń úlken armanym boldy. Baǵym janyp bıyl sonyń yńǵaıy týyp, dodaǵa qatysýdyń reti kelip otyr.

- Seni ádil qazylar «Altaıdyń ar jaǵynan kelipti» dep jyly qabyldap, qolpashtap jatty. Óziń jaıly tanystyra ketseń.

- Men 1983 jyly İle Qazaq Avtonomıaly oblysynyń, Tekes aýdany, Shyńǵystaı jegen jerinde ómirge kelippin.

- Balaǵa óner ananyń sútinen, ákeniń qanynan darıdy dep jatady, óziń ónerge qalaı keldiń?

- Óner maǵan naǵashy jaǵymnan keldi. Bizdiń úıde án salatyn eshkim joq, men ǵana. Menen basqa eshkim de án salmaıdy. Sheshem biraz án salady. Sodan shyǵar men ónerge jaqyn boldym.

- Madına Sadýaqasova seni «Aǵajaıdy» úsh daýyspen jetkizdi dep maqtap jatty. Án salyp júrgen ónerińmen, talabyńmen arnaıy akademıalyq bilim aldyń ba?

- Arnaıy bilim almadym. Biraq, qazaqtyń mańdaı aldy ánshileriniń bárin tyńdap óstim. Ermek Serkebaev, Bekbolat Tileýhan, Ramazan Stamǵazıev aǵalarymyzdyń ónerinen úlgi aldym. Eliktep án saldym.

- Alǵash tanysqanymyzda elge kelýiń týraly Maqataevqa arnalyp túsiriletin kınoǵa arnaıy shaqyryldym dep ediń. Ol kınoǵa qalaı shaqyryldyń, sol kıno kórermenge jol tartty ma?

- Bul kıno muzbalaq aqyn Muqaǵalı Maqataevtyń «Jetim kól» poemasy jelisinde túsirilmekshi bolǵan. Negizi fılmge basynda túsideıin tústim, biraq, keıin tehnıkalyq, basqa da sebeptermen bul kınonyń túsirilimi aıaqsyz qaldy.

- Al, myna «Qazaqstan daýysy» baıqaýyndaǵy daıyndyǵyń qalaı júrip jatyr?

- Bul jobada qazir ár tálimgerde 4-ten ónerpaz qaldyq. Men Rústem Nurjigittiń qolyndamyn. «Aǵajaıdy» aıtqan sebebim, qazir ánshiler nemese án salmaqqa umtylyp júrgender qaı-qaıdaǵy ándi aıtatyn boldy. Bul jaqtaǵy qazaqtar ǵana zardap kórgen joq, Qytaıdaǵy qazaqtar ǵana aýyr kezeńderdi bastan keshti. Men de zamannyń zaryn aıtý arqyly eldiń muńyn jetkizgim keldi. Alla qoldap jeńimpaz bolam ba degen úmitim bar!(Kúledi). Negizgi maqsatym – qazaqtyń án ónerine óz úlesimdi qosý, qazaq ánin nasıhattaý. Sol murat jolynda shama-sharqymyzsha qyzmet jasaý.

- Rahmet. Óner jolyndaǵy talpynysyńa sáttilik joldas bolsyn deımiz.

Áńgimelesken: Erlan Tóleýbaı