Qutqar meni,jalǵyzdyq

Senen ózge izder deısiń kim bizdi,

Jyldar mújip taýysqan syndy juldyzdy.

Qarańǵylyq jetip mysyq tabandap,

Kóleńkemen qol alysyp úlgerdi.

Ózge aǵytqan túımesindeı meńdimniń,

Kókjıekten kólbep sýsı berdi kún.

Jabyǵady jartasta ósken jas terek,

Óz tamyry tesip enip óz dińin...

Súrtilgen myń qurǵaq bultpen ysqylap,

Aspanymnan túskendeı bar qus qulap.

Jalbyr - julbyr japyraqtar aýaǵa

Qol jaıady kúmis jarmaq – shyq surap.

Jaraly jyr jylan – túnmen arbasyp,

Alasurdym taba almaı aıla túk.

Qutqar meni jalbyzyńmen, jalǵyzdyq,

Qasirettiń qazanyna qaınatyp.

                             Sekem

Jarym, meni jabyqsyn degeniń be,

Sóndirmeshi shyraqty, keregi ne?!

Qaınaǵan qara maıdaı túndi bireý,

Quıardaı aı – ojaýmen kómeıime!

Tútini beıne týǵan jerdiń bulty,

Shylymmen ashylar-aý muńnyń qulpy.

Kóterme telefondy,

Onsyzdaǵy

qaptaǵan qulaǵyma sózdiń qurty.

Qıalym qaıda meniń shyńdy arbaǵan,

Sheksizdikten sheńgelim muń qarmaǵan.

Dalaǵa shyqpaıynshy,

Men bir pende

aq qardan basqasynda izi qalmaǵan.

Qaldyrdym tym alysta bar asyldy,

Tappadym senen basqa janashyrdy.

Tastaıyn temekimdi,

Órtep alyp

júrmeıin qara maıdaı qara túndi.

Tuıyq álem

Sol álem,

Tuıyq álem...

Jarda kúlip

Turamyz adyra qap arman - úmit.

Kúnder keıin qashady,

Otyzynshy

bireýi alsa basyn aıǵa uryp.

Sol qala, ol baıaǵy buryshtamyz,

Buryshtan basqa jerdy umytqamyz.

Janymdy  ezdi - aý sylbyrań dalamen bir,

Jylaǵan  japyraq–  erni jyryq tamyz.

Qum – qaıǵy jas ómirdiń órtin kómip,

Ǵajap - aý,jyldar boıy serpilmedik.

Jańa  jyl otshashýdan beti kúıip,

Ketedi  sátte kári kempir bolyp .

Baratqan aqsaı basyp jónine bir ,

Jańalyq, eı, jańalyq! Úıime kir.

Tunshyǵyp jatyrym taǵy tyrmalanyp ,

 Sol álem,

 Tuıyq alem,

 Tuıyq ómir...

Altaı  ańyzy

Arda Altaı men Almatynyń arasyn,

Jalǵamasań qalaı tynym tabasyń?!

Dóń  basynda buǵy tur ma,

Jarty aımen

múıiziniń kóbeıtip bir salasyn?!

Anań men tek aq álemdi kóresiń,

Sana qaıda sergeldeńdi sezetin?

Qaınar – kózi úzilse de aq bulaq,

Quıyryǵy joq kesirtkedeı bezetin!..

Ǵajaıyp bop kórinsin dep qara tún,

Janaryńa juldyz sýret salatyn.

Samal terbep ótse sylqym gúlder de,

Shyq – monshaǵyn aýystyryp taǵatyn.

Tasta ot shashyp tulparlardyń taǵasy,

Jan  otym da tutanǵan - aý shamasy.

Jartastarǵa aıǵaılasań,

 Únińniń

 jeter shaýyp kóp jańǵyryq – balasy.

Altaı!

Altaı!

Ańyzdaǵy bir uǵym,

Shyńǵyrady quryq býnap qulynyń.

Medet tutam kórip kókten jarty aıdy,

Ker buǵymnyń muıiziniń synyǵyn...

*****

Bireýdiń jolyn qýyp júrsiń deme,

Jaralǵan júrek dara dúrsildeýge.

Túısiktiń tolqyny bop tirilgenmin,

Teńizge kóktegi kún kúrsingende.

Pakızat óner syılap pań balaǵa,

Ózi súırep keledi arman alǵa.

Kóktegen kóńil gúlim ,

Ańsaý deıtin

anamnyń súti tamyp aq dalaǵa.

Sulatyp sur dalaǵa kári qysty,

Emdeımin janartaýym janyp ishki.

Kóp  jatyp jartastarda,

Kókiregime

júz jyldyq dala jyry jazylypty.

Qoltyqqa tasqa aınalǵan teńdi qysyp,

Taýlar maǵan ermekshi entigisip.

Kim bilsin qashan toqtar ,

Toıymsyzdaý

júregim kele jatyr joldy jutyp ...

******

Bult – muńdy qaýzaı beremin,

Nóser bop sátke quıylmaı.

Óldi ǵoı talaı óleńim,

Aq paraq – kebin buıyrmaı.

Ketippin tas bop, bilmedim,

Muń shaǵyp júrip tasqa da.

Joǵaldy birge kir deıin

dostarym sińgen aqshaǵa.

Qaıtatyn qandaı qaqym bar,

Qaldyrym bárin alysta.

Ǵaryp bop keter aqyndar,

Ketem dep júrip ǵaryshqa.

Qaraýsyz qalǵan qalqada,

Jatyr ǵoı jyrym jótelip.

Máz bolady alaý arqaǵa,

Albasty –  túndi kóterip...

*****

Eńkeıer  shybyq tabylǵan

Súımek bop jeriń ár tasyn.

Jatady taýlar aýyrǵan

Bastyryp bultqa arqasyn.

Jazady saǵym basqa eshkim

túsinbes jyryn astarlap.

Jaǵaǵa kelgen aq tolqyn

 Kóterip qaıtar bas barmaq.

Aıasyna aına-bastaýdyń

Keterdeı syıyp ǵaryshyń.

Shyrmaýyq órler jas taldyń

Janynyń syıpap aǵysyn.

Artyqtaı  mynaý alapta,

Barady  adam jolda aǵyp.

Arqasyn súıep aǵashqa

Kóleńke otyr oılanyp...

Qalaý Sálemetbaıuly