Prokýrorlar Taıaý Shyǵys elderindegi shıelenis aımaǵynda júrgen qazaqstandyqtyń týysyna ony qarjylandyrmaý jóninde aldyn ala saqtandyrý berdi dep habarlaıdyTengrinews.kz Almaty oblysy prokýratýrasynyń baspasóz qyzmetine silteme jasap. "Qaratal aýdany prokýratýrasy týystary men serikteri tarapynan terorıstik nemese ekstremıstik qyzmetke qarjylaı qoldaý kórsetý jáne terorızmge nemese ekstremızmge basqa da dem berýshilik jasaý deregin boldyrmaý úshin QR "Prokýratýra týraly" zańynyń 25-1-baby tártibinde Qaratal aýdanynyń A. degen turǵynyna jazbasha aldyn ala saqtandyrý berdi", - delingen oblys prokýratýrasy baspasóz qyzmetiniń habarlamasynda. Prokýrorlardyń málimetine qaraǵanda, bul azamattyń nemere aǵasy Taıaý Shyǵystyń shıelenis bolyp jatqan aımaǵynda júr. Oǵan óz týysyn ǵana emes, dástúrli emes, ekstremıstik baǵyttaǵy dinı aǵymdardyń basqa da ókilderine qarjylaı kómektesýge QR Qylmystyq kodekstiń 233-3-baby, ıaǵnı "Terorıstik nemese ekstremıstik qyzmetti qarjylandyrý jáne terorızmge nemese ekstremızmge basqa da dem berýshilik jasaý" baby boıynsha qylmystyq jaýapkershilik qarastyrylatyny eskertildi. Aıta keteıik, buǵan deıin Qaraǵandy jáne Atyraý oblysynyń qarjy polısıasy terorızmdi qarjylandyrdy degen kúdikpen tórt azamatqa qatysty qylmystyq is qozǵaǵan bolatyn. Qaraǵandylyq úsh azamat sheteldegi lańkesterge 2012-2013 jyldary 600 myń teńgeden astam qarajat aýdarsa, Atyraý turǵyny halyqaralyq terrorlyq uıym esepshotyna 2 myń dollar salǵan.