Keshe ǵana Elbasy Nursultan Nazarbaev eldiń jańa jyldyq bas shyrshasyn jaǵyp, Qazaqsatan halqyn kele jatqan jańa jylmen quttyqtady. Jalpy, jeltoqsan aıy týa salysymen búkil álemniń jańa jylǵa daıyndyq kóretini ótirik emes. Sondyqtan, Elbasy da elden qalmaı óz halqyn quttyqtap, jańa jyldan jaqsy jańalyqtar kútkeniniń nesi aıyp deıtin shyǵarsyz?

Biz ózgeler sıaqty jeltoqsan týa salysymen jańa jylǵa jospar quratyn halyqtyń qatarynan emespiz. Aldymyzda keshegi Kenesary han men Mahambettiń, Álıhan men Ahmettiń, Qaırat pen Erboldyń basy men qany tekke ketpedi dep ózimizdi jubata alatyn, kók týymyzdy kókimizde qalyqtatqan eń bir uly kúnimiz tuǵyrly táýelsizdikimiz tur edi. Arıne, jeltoqsannyń 16 kúni táýelsizdik kúnimiz ekenin umyta qoımaǵan bılikte tulǵalar joq emes. Keshegi ákim, búgin isti bolyp otyrǵan Baýyrjan Ábdeshovtan bastap, qazirgi «Nur Otan» partıasy tóraǵasynyń birinshi orynbasary Asqar Myrzamhmetov myrzaǵa deıingi birneshe shendiler Qazaq Elinde Táýelsizdik kúni ótpeıinshe, jańa jylǵa daıyndyq jasalǵanyn qalamaǵan edi. 

Ońtústikte táýelsizdik kúni ótkenshe shyrsha jaqpaq turmaq, «Jańa jydyńyzben» degen bir sóz jazǵyzbaǵan Asqar Myrzahmetov pen Berik Ýálı «Nur Otanǵa» kelgen soń, ıgi dástúrdi búkil elge jalpylastyrmaq bolyp edi, ókinshike oraı, Astana men Almaty qalasy bastap, Aqorda qoshtap jańa jyldyń daıyndyǵy jyldaǵydaı bastalyp ketti. Solaı, bılik jaqtan jyltyrǵan úmit sáýlesi de úzildi. Bılikke táýelsizdik kúnimiz kerek emes shyǵar? Biraq, qarapaıym ár qazaq úshin táýelsizdikten artyq qastarli uǵym joq. Dál osy kúnniń qandaı aýyr qurbandyqtarmen kelgeni barsha qazaqqa belgili ǵoı. Qandaıda bir jeńis aýyr bodaýlar bermeı kelmesi anyq. Kenesary, Isataı, Mahambetterdiń, Alash arystarynyń qoly jetpeı ketken azattyq bizdiń basymyzǵa qondy. Alyp ımperıanyń irgesiniń sógiliýine sebep bolǵan jáne aıaaýsyz Qazaq jastary qyrǵynǵa ushyraǵan 16 jeltoqsan kúni men táýelsizdigimizdiń bir kúnge kelýi - táýelsizdiktiń óte aýyr joldar basý arqyly kelgenin qazaqqa umyttyrmaý bolsa, Jańaózendegi jaǵdaı táýelsizdikimizdiń baǵasyna jetelmaı júrgenimizdiAllanyń eskertýi shyǵar.

Endeshe, «jańa jyldyń» aldyna «táýelsizdigimizdi» qalaı shyǵara alamyz? Bul jaǵy kópti mazalasa da, jasalyp jatqan naqty áreket shamaly.  Bılik, úkimet, qala ákimshilikteri elemedi deıik, sonda ózimiz ne tyndyryp jatyrmyz? Ár qaladaǵy qaptaǵan shyrshalardyń bárin ákimder qoımaǵany anyq! Solardyń orynyna bolmasa da, ózimizge tıesili jerlerge táýelsizdigimizdi aıqyndaıtyn, táýelsizdik kúni kele jatqanyn bildiretin belgiler qoısaq qaıter edi? Kózge kórinerlik ár jer táýelsizdik kúni kele jatqanyn kórsetip turatyndaı bolýy kerek. Qoǵamdyq kólikterge, áleýmettik oryndardyń ár jerine táýelsizdik týraly rýhty sózder ilinilýi tıisti. Tipti, árkim óz qyzmet keńsesine qoısa da, «Táýelsizdik kúni qutty bolsyn» degen qaǵazdar japsyrsa da, bir-birimizge syılyq syılap jatsaqtaTáýelsizdikke qurmetimiz bolar edi. Qasterli qundylyǵymyz Táýelsizdiktiń qadirin baǵalasa aldymen qazaq baǵalaýy zańdy!

Táýelsizdik kúnin ózimiz basqarǵa sezdire bileıik. Ony sezdiretin, bildiretin siz ben biz, tek qazaqtar ǵana. Sebebi, Táýelsizdigimiz tek ózimizge, tek qazaqqa kerek. «Bir el, bir taǵdyr» dep urandaımyz ǵoı. Biz, sol taǵdyryn bizben ushtastyrǵannyń bárine osy kúnimizdi ulyqtata bilýimiz kerek. Ár mekeme, ózinde táýelsizdik kúni men jeltoqsan kóterilisine arnap is sharalar ótkizýge mindetti. Ol sharalar tek bir adamnyń basyna ǵana maqtaý bolyp ketpeı, tutas táýelsizdikke umtylǵan qadamdarymyzdyń bárine toqtala kelip 1986- jylǵy qazaq jastarynyn asqaq rýhyn jetkize bilý kerek. Ásirese,ondaı sharalardy bolashaq urpaqty tárbıelep otyrǵan oqý oryndary basty nazarǵa alǵandary jón.

Árqandaı bir qasyrettiń artynan aq tań atyp, el qýanyshqa bóleneri anyq. Bizdiń jeltoqsandaı qasyretimizdiń artynan taýelsizdigimiz týdy. Sondyqtan, 16- jeltoqsan kúni aldmen 1986 jylǵy Jeltoqsan kóterilisiniń qurbandary men barsha táýelsizdik jolynda qurban bolǵan arystarymyzdyń rýhyna taǵzym etip, arnaýly astar berip tipti qurbandyqtar shalý kerek. Sondan ary qaraı qasyrtetimizdiń artyn toıǵa ulastyryp el birligin, memleket qýattylyǵyn kórsetetin sharalardy uıymdastyryp,Aıbyndy áskerı sherýler jasap, búkil álemge endi Alashty eshkimge qorlata qoımaıtyn kúshimizdi kórsetýimiz kerek edi.

Sózimniń basyn jańa jylman bastap edim, jańa jylman aıaqtaıyn. Kóp halyq jańa jyldy syrtqa shyǵyp alańdarda ótkizedi ǵoı. Men soǵan qyzyǵam. Táýelsizdik kúnimizdi odan da kóp bolyp jınalyp, birge  ótkizý armaym ǵoı. Ol kúni bılik adamdardyń jınalýynan qoryqpaı, jastardy qamap ustamaı, halyq pen bılik arasyna ózara senim ornata otyryp, barshamyz jınalyp, bir alańda ótkizetin kún týsa deımin.

Qurmetti oqyrman, kele jatqan Táýelsizdik kúnimiz qutty bolsyn!

Turdybek Qurmethan