Qaıdasyń, Ianýkovıch? Ýkraına burynǵy prezıdenti Vıktor Ianýkovıchti izdep, tappaı jatyr. Kıevtegi tóńkeristen keıin onyń Harkov qalasyna barǵany belgili. Muny dáleldeıtin beınejazba da bar. Keıbir málimetterde onyń sol jerden Birikken Arab Ámirlikterine ushyp ketkeni aıtylǵan-dy. “Doneskıe vestı” gazetiniń habarlaýynsha, Ianýkovıchtiń ushaǵynyń Birikken Arab Ámirlikterine ushyp ketken ras. Biraq onyń ishinde Ianýkovıch bolmaǵan. Bul jurttyń nazaryn basqa jaqqa aýdarý úshin jasalǵan qýlyq. Gazetke habar jetkizgen senimdi derekkózdiń málimetinshe, Vıktor Ianýkovıch Harkov qalasynyń túbindegi saıajaıda tyǵylyp jatyr. Bul saıajaı jergilikti yqpaly zor sheneýniktiki. Ianýkovıch áli kúnge sonda tyǵylyp otyr ma, joq pa, ol jaǵy belgisiz. Keıbir málimetterde Vıktor Ianýkovıchtiń mashınamen Qyrymǵa qaraı qashyp ketkeni aıtylady. Ýkraınanyń «Bostandyq» ultshyl partıasynyń jetekshisi Oleg Tágnıboktyń oıynsha, Ianýkovıch Reseıdiń Qara teńiz floty jalǵa alǵan Ýkraınanyń Sevastopol qalasynda. Ianýkovıchke qoldaý kórsetý maqsatynda Reseı osy qalaǵa óz áskerin kirgizbekshi. Osydan bir kún buryn «Ianýkovıch Qyrymda ustaldy, ony arnaıy ushaqpen Kıevke alyp kele jatyr» degen aqparat aıtylǵan. Biraq, bul sóz beker bolyp shyqty. Vıktor Ianýkovıchtiń qaı jerde jasyrynyp júrgeni jóninde túrli boljam aıtylady. Bireýler onyń Máskeýde otyrǵanyn aıtsa, endi bireýler Ianýkovıch Ýkraınaǵa irgeles jatqan Reseı qalalarynyń birinde dep esepteıdi. Qalaı bolǵanda da, osy boljam kóńilge qonymdy. Sebebi, Harkov, Sevastopol, Kerch sıaqty qalalardyń halqynyń basym bóligi Ýkraınanyń jańa bıligin moıyndamaǵanymen, ol jerlerdegi Ýkraınanyń qaýipsizdik qyzmeti men basqa organdar Kıevke baǵynady. Eldiń ortalyq bıligi Ianýkovıchti Kıevtegi qyrǵynǵa kináli dep taýyp, qylmystyq is qozǵap, oǵan izdeý jarıalady. Sondyqtan onyń Ýkraına aýmaǵynda tyǵylyp júrýi qaýipti. Ýkraınanyń arnaýly qyzmeti timiskilenip júrip, ony kez kelgen ýaqytta ustap alýy múmkin. Al Ýkraınanyń jańa bıligi kezekten tys prezıdenttik saılaý ótkizý naýqanyn jarıalady. Prezıdenttikke úmitkerlerdi tirgeý 25 aqpanan 4 sáýirge deıin sozylady, prezıdenttik saılaý 25 mamyrda ótedi. Ázirge prezıdenttik saılaýǵa qatysqysy keletini jóninde Harkov oblysynyń gýbernatory Mıhaıl Dobkın, opozısıanyń lıderleri Iýlıa Tımoshenko men Vıtalıı Klıchko málimdedi. Biraq, olar da áli ortalyq saılaý komısıasyna jazbasha ótinish bergen joq.