25 aqpan kúni RF Syrtqy ister mınıstriniń orynbasary Grıgorıı Karasın Qazaqstannyń Reseıdegi elshisi bolyp qaıta taǵaıyndalǵan Marat Tájınnen senim gramotasynynyń kóshirmelerin qabyldady. Áńgime barysynda reseılik-qazaqstandyq yntymaqtastyq, ıntegrasıalyq qurylym sheńberindegi ózara áreket, aımaqtyq jáne halyqaralyq problematıka máseleleri talqylandy. "Kezdesý Qazaqstan-Reseı qarym-qatynasy úshin ádettegideı senimdi ári tatý atmosferada ótti. Qazaqstan Respýblıkasynyń elshisin Syrtqy ister mınıstri Sergeı Lavrov ta qabyldady", - delingen RF SİM saıtyndaǵy habarlamada.

Reseı Memlekettik dýmasyndaǵy opozısıalyq partıa jetekshisi Vladımır Jırınovskııdiń spıkerdiń orynbasary ári qorǵanys jónindegi komıtettiń múshesi ekenin aıta ketý kerek. Ol "Rossıa 24" telearnasynyń efırinde 23 aqpan - Reseıdegi Otan qorǵaýshy kúnine oraı sóılegen sózinde "Ortalyq Azıada eshqandaı respýblıka bolmaýy kerek. Ortaazıalyq federaldyq okrýgi, onyń basty qalasy - Vernyı! Búginde qalanyń bóten ataýy bar, Alma-Ata - meniń týǵan qalam. Ony Ózbekstan, Qyrǵyzstan, Tájikstan, Túrikmenstan, Qazaqstan oılap tapty. Ortaazıalyq federaldyq okrýg!" - dep málimdegen bolatyn. Qazaqstannyń Syrtqy ister mınıstrligi budan keıin Jırınovskııdiń pikirine baılanysty Reseıdiń Syrtqy ister mınıstrligine nota ázirlep jatqanyn habarlady. Al elimizdiń saıasattanýshylary Jırınovskııge Qazaqstanǵa kirýge tyıym salýdy usyndy. Eks-senator Ǵanı Qasymov ony saıası qaıratker bolý quqyǵynan aıyrý kerektigin aıtty. RF Federaldyq jıyny Memlekettik dýmasy apparaty jetekshisiniń orynbasary, qoǵammen baılanys jáne BAQ-pen ózara árekettesý jónindegi basqarmanyń bastyǵy Iýrıı Shývalov Qazaqstan men Reseı qatynastarynda eshqandaı ózgeristiń bolmaıtynyn jetkizdi. Onyń aıtýynsha, qazir reseılik halyq qalaýlylarynyń sózin durys jetkizbeý baıqalyp otyr.

 Tengrinews.kz