Qazaq handyǵy tarıhymen halqyn qaýyshtyrǵan belgili jazýshy İlıas Esenberlınnin áıgili trılogıa romany "Kóshpendiler" Qazaq handyǵynyń 550 jyldyǵy jáne jazýshynyń týǵanyna 100 jyl tolýyna baılanysty túrik tiline aýdaryldy. Tusaýkeser jınalysy 10 jeltoqsan kúni Stambul ýnıversıteti Túrkologıa ınstıtýty men Qazaqstan Ankara Elshiligi tarapynan Ystambulda ótkizilmek, - dep habarlaıdy «Qamshy» portaly.
Qazaq ádebıetiniń kórnekti jazýshylarynan İlás Esenberlın tarıhı romandarymen bir eldin taǵdyryn ózgertken álemde neken saıaq kezdesetin jazýshylar qatarynda. Onyń kóp jyldar kóz maıyn taýysyp zertteý jumystary júrgizip baryp eshkimniń tarıhı shyndyqtardy jazýǵa da, ataýǵa da batyly jetpegen tusta jaryq kórgen “Kóshpendiler” atty trılogıasy qazaq halqynyń ulttyq syıpatyn saqtap qalýda mańyzdy ról atqarǵan.
Mımar Sınan kórkem óner ýnıversıtetiniń profesory, tarıh ǵylymdarynyń doktory jáne aýdarmashy Ábdiýaqap Qaramen birge bıylǵa úlgerý úshin tórt aýdarmashy tize qosa otyryp túrik tiline aýdarǵan úsh tomdyq romannyń tusaýkeserin Qazaqstan Anqara Elshiliginiń qamqorshylyǵynda Ystambul ýnıversıteti Túrkologıa ınstıtýty uıymdastyrýda.
Instıtýttyń jyl saıyn ótkizip otyrǵan “Nemat Kelimbetov oqýlary” aıasynda “Tarıhı sana jáne ádebıet” degen taqyryppen ótkiziletin tusaýkeser jınalysyna belgili ǵalymdar, zıaly qaýym jáne ádebıet súıgish oqyrmandar qatysady dep kútilýde.
2015 jyly 10 jeltoqsanda Ystambulda ótetin alqaly jıyndy Túrkologıa ınstıtýtynyń dırektory profesor Azmı Bilgin men Qazaqstan Anqara Elshisi Janseıit Túımebaev sóz sóılep ashady. Osydan keıin bir qatar ǵalymdar, atap aıtqanda Marmara ýnıversıteti Túrkologıa ınstıtýtynyń dırektory profesor Gúlshen Seıhan Alyshyq, Jetitóbe ýnıversıtetiniń profesory Ahmet Tashaǵyl, Mımar Sınan kórkem óner ýnıversıtetiniń profesory Ábdiýaqap Qara, Ordu ýnıversıtetiniń profesory Ismaıl Doǵan, Almatydaǵy Súleımen Demırel ýnıversıtetiniń dosenti Esengúl Qapqyzy jáne TÚRİKSOI Qazaqstan ókili jáne aýdarmashy Málik Otarbaev Esenberlınniń ómiri, eńbekteri jáne shyǵarmashylyǵy men halyqtyq tarıhı sanany qalyptastyrýdaǵy ádebı týyndylardyń róli týraly baıandamalar jasamaq.
Esenberlınniń “Kóshpendiler” romanymen túrik – qazaq ádebı baılanystarynda jańa bir kezeń bastalyp oqyrmandardyń qazaq qalamgerleriniń týyndylaryna qyzyǵýshylyǵynyń odan ári arta túsetini anyq.
