2017 jylǵy Qysqy Ýnıversıadaǵa daıyndyq Halyqaralyq stýdentter sporty federasıasynyń reglamenti boıynsha sátti júrgizilýde. Bul týraly Qazaqstanǵa is-saparmen kelgen FISU Prezıdenti Oleg Matysın málimdedi, - dep habarlaıdy «Qamshy» portaly.
FISU ókilderi qaıta saılanǵan Prezıdentteri Oleg Matysınmen Almatynyń Ýnıversıadaǵa daıyndyǵymen tanysý úshin keldi. Olar Astanada 2017 jylǵy Ýnıversıada uıymdastyrý komıtetiniń basshysy, vıse-premer Darıǵa Nazarbaevamen kezdesý ótkizdi. Kezdesý barysynda taraptar Qysqy Ýnıversıadany uıymdastyrýda ózekti máselelerdi talqylady. Oleg Matysın joba sátti bolatynyn, Qazaqstan memleketi Halyqaralyq federasıanyń tarıhynda osy iri jobany uıymdastyrýdaǵy senimdi seriktes bolyp qalatynyna senim bildirdi.
"Ýnıversıadaǵa deıin ýaqyt az qaldy, biraq jumystardyń qarqyndy júrip jatqanynan habardarmyz. Sondyqtan barlyǵy oıdaǵydaı bolatynyna shúbá keltirmeımiz", - dedi FISU Prezıdenti.
Ol Ýnıversıadany ótkizýdegi Almatynyń rólin de atap ótti.
«Asa jaýapkershilik Almaty qalasyna túsip tur. Óıtkeni bul shaharda barlyq saıystar ótedi. Sol sebepti Halyqaralyq federasıa men Almaty ákimshiliginiń, qalalyq Dıreksıamen birlese jumys týraly máselerge nazar aýdardyq. Biz Almaty ákimshiligine rızashylyǵymyzdy bildiremiz, óıtkeni olar osy joba arqyly Almatyny álemge tanytýdy kózdep, barlyǵyn FISU reglamenti boıynsha oryndap jatyr", -dedi Oleg Matysın.
Almatydaǵy Qysqy Ýnıversıada oıyndary 2017 jyldyń 29-shy qańtarynan 8-shi aqpan aralyǵynda ótedi. Qysqy Ýnıversıada saıystaryna 55 elden 2000 sportshy qatysady. Ýnıversıada ýaqytynda 3000 erikti jumyldyrylady. 30 000 -nan astam sheteldik qonaqtar keledi dep kútilýde. Ýnıversıadany 80 elden 1 mlrd halyq tamashalaıdy dep josparlanǵan. Ýnıversıadanyń operasıalyq búdjeti eki esege qysqaryp, 17 mlrd teńgeni quraǵan. Qazaqstandyq kásiporyndaryn qoldaý maqsatynda qazaqstandyq qamtý 50 % bolmaq.
Jarystar 13 sport túrinen, 8 sport nysanynda ótkiziledi. Qazir jańa úsh sport nysany boı kóterýde. Olar 5000 adamdyq Atletıkalyq qalashyq, 3 myńdyq Muz arenasy jáne 12 myńdyq Muz saraıy. Bul sport nysandarynyń qurylysy 70 paıyzǵa daıyn jáne 2016 jyldyń jaz aılarynda tolyq bitedi dep josparlanǵan.
