Qazaqstan-Qytaı İskerlik keńesiniń 3-shi otyrysynyń qorytyndysy boıynsha 10 mıllıard dollardyń kelisimine qol qoıyldy, - dep habarlaıdy «Qamshy» portaly Primeminister.kz-ke silteme jasap.

Onyń ishinde "Qazaqtelekom" AQ men China Telecom Global Limited arasyndaǵy yntymaqtastyq týraly memorandým; "QazMunaıGaz" UK" AQ men "Sinopec" korporasıasy arasynda ózara túsinistik memorandýmy; "Kazakhstan Petrochemical Industries, Inc" JSHS men China National Chemical Engineering Co. Ltd arasynda Atyraý oblysynda ıntegrasıalanǵan gaz-hımıa keshenin salý jobasy boıynsha ERS-kelisimi; tústi metalýrgıa (mys óndirý) Indýstrıalyq parki jobasy boıynsha "Central Asia Gold corporation" JSHS men Shenyang Lianli Copper kompanıalaryny basshylary qol qoıǵan memorandým bar.

Kelisimsharttar QR premer-mınıstri Kárim Másimovtiń Qytaıdaǵy sapary barysynda jasaldy. "Elderimizdi jaqyndastyratyn birneshe mańyzdy baǵdarlamalar bar. Birinshisi - QHR Tóraǵasy Sı Szınpınniń 2013 jyly Qazaqstanǵa sapary barysynda jarıalaǵan "Bir beldeý - bir jol" baǵdarlamasy. Ekinshisi - QR Prezıdenti Nursultan Nazarbaevtyń "Nurly jol" baǵdarlamasy. Osy eki baǵdarlama birin-biri tolyqtyrady dep esepteımiz. İskerlik Keńes pen kásipkerlerimizdiń tabysty qyzmeti osy eki baǵdarlamamen baılanysty", - dedi Kárim Másimov.

Sonymen qatar, ol ótken jyldyń jeltoqsanynda QHR Memlekettik keńesi premeri Lı Kesánniń Astanaǵa sapary barysynda İskerlik Keńestiń kezekti otyrysy ótkenin eske saldy. "Onda ónerkásiptik qýattylyqtardy Qytaıdan Qazaqstanǵa kóshirý baǵdarlamasy týraly túbegeıli sheshim qabyldandy. Bir jyl ótken soń osy baǵdarlamanyń tıimdi jumys jasap jatqandyǵyn kórip otyrmyz. Búgin İskerlik Keńes aıasynda jáne erteń QHR Memlekettik keńesi premerimen kelissózder qorytyndysy boıynsha naqty kásiporyndar qurý týraly qujattarǵa qol qoıylady", - dedi Úkimet basshysy.

 «Qamshy» silteıdi