Elbasy Nursultan Nazarbaev Qorǵanys mınıstrliginiń basshylyǵymen kezdesti. Bul týralyAqordanyń baspasóz qyzmetinen habarlady.

İs-sharaǵa Prezıdent Ákimshiliginiń Basshysy N.Nyǵmatýlın, Prezıdenttiń kómekshisi - Qaýipsizdik Keńesiniń hatshysy N.Ermekbaev qatysty.

Keńes barysynda eldiń qorǵanys qabiletin jáne áskerlerdiń jaýyngerlik daıyndyǵyn arttyrý jónindegi Qarýly Kúshter qyzmetiniń 2015 jylǵy qorytyndylary talqylandy.

Qazaqstan Prezıdenti álemdik ekonomıka men halyqaralyq saıasattaǵy qıyndyqtarǵa qaramastan elimizdiń turaqty damyǵanyn, daǵdarysqa qarsy tıisti strategıasyn ázirlegenin jáne bıylǵy jyldy oń kórsetkishtermen aıaqtap otyrǵanyn atap ótti.

Memleket basshysy «Nurly jol», ındýstrıalyq-ınnovasıalyq damý baǵdarlamalary men Bes ınstıtýsıonaldyq reformanyń kezeń-kezeńimen júzege asyrylyp jatqanyn aıtty. Qazaqstan Prezıdenti bul oraıdaǵy qadamdar alǵa qoıylǵan aýqymdy mindetterdi belsendi túrde ári nátıjeli júzege asyrýdy qajet etetinine toqtaldy.

Nursultan Nazarbaev armıanyń qazirgi zamanǵy áskerı jáne terrorlyq qaterlerdiń aldyn alý men boldyrmaýdaǵy mańyzdy rólin atap ótti.

Árbir qazaqstandyq óz qaýipsizdigi týraly oılaı otyryp, eń aldymen Qarýly Kúshterimizge úmit artady. Sondyqtan eshqaısyńyz muny umytpaýlaryń kerek. Sizder ózderińiz árdaıym tas-túıin daıyn jáne bes qarýlaryńyz da saı bolǵany jón. Memleket óz tarapynan armıaǵa qajetti barlyq jaǵdaıdy jasaýǵa tıis. Sizderdiń mindetterińiz - ofıserler men sarbazdardy tárbıeleý jáne sapaly deńgeıde daıarlaý, - dedi Memleket basshysy.

Sonymen qatar Joǵarǵy Bas Qolbasshy Qarýly Kúshterdiń áskerı qyzmetshileri qarýly qaqtyǵystardyń jańa úrdisteri men erekshelikterin eskerý kerektigin, kásibı, jaýyngerlik jáne moraldyq-psıhologıalyq daıarlyq deńgeıin udaıy arttyryp otyrýǵa tıistigin aıtty.

İs-shara sońynda Memleket basshysy Qarýly Kúshterdi 2016 jylǵy damytýǵa baılanysty birqatar mindet qoıdy jáne ofıserlerdi aldaǵy merekemen quttyqtap, basshylyq quramǵa jańa qyzmettik kólik kiltterin tapsyrdy. 

Astana