"Qazgıdromet" ortalyǵynyń mamandary 2016 jyly qańtarda Qazaqstanda aýa raıynyń qandaı bolatynyn aıtty, - dep habarlaıdy «Qamshy» portaly.
Ortalyq ınjeneri Álıa Ospanovanyń aıtýynsha, qańtar aıynda Qyzylorda, Ońtústik Qazaqstan, Jambyl, Almaty, Qaraǵandy jáne Shyǵys Qazaqstan oblystarynda aýa temperatýrasy normaǵa saı bolady, al qalǵan oblystarda normadan 1 gradýsqa tómen bolady.
Sonymen qatar, Batys Qazaqstan, Atyraý, Qyzylorda oblystarynyń keı jerlerinde jaýyn-shashynnyń túsý kólemi normadan tómen bolady. Óz kezeginde Qostanaı oblysynyń soltústiginde, Soltústik Qazaqstan, Pavlodar, Aqmola oblysynyń keı jerlerinde jáne Qaraǵandy oblysynyń keı aýdandarynda, sonymen qatar, ońtústik, ońtústik-shyǵys pen shyǵystaǵy taýly jáne taý etegindegi aýdandarda jaýyn-shashyn kólemi normadan joǵary bolady. Al qalǵan óńirlerde jaýyn-shashyn normaǵa saı túsedi.
Sınoptıkterdiń málimetinshe, qańtar aıynyń basynda soltústik bóliktiń aýa raıyna arktıkalyq antısıklon yqpal etip, túnde aýa temperatýrasy 25-33 gradýsqa deıin tómendeıdi, kúndiz 20-25 gradýs aıaz bolady, al ońtústik bólikke - Ońtústik-Kaspıı sıklony. Bul óńirlerde aýa raıy buzylady: jaýyn-shashyn, túnde jáne tańerteń tuman túsip, kóktaıǵaq bolady, keı jerlerde jeldiń jyldamdyǵy sekýndyna 15-20 metrge deıin jetip, túnde 0-5, kúndiz 3-10 gradýs jyly bolady.
Jańa 2016 jyldyń jumys aptasy bastalǵanda respýblıka aýmaǵy sýyq arktıkalyq antısıklonnyń yqpalynda bolady dep kútilip otyr, osyǵan baılanysty aýa temperatýrasy tómendep, qańtardyń birinshi onkúndiginiń sońynda qatty aıaz bolady: soltústikte túnde 33-38, kúndiz 25-30 gradýs aıaz bolady, al ońtústikte túnde 13-23, kúndiz 8-13 gradýs sýyq bolady. Qańtardyń ortasynda aıazdyń beti qaıtady. Oǵan ońtústik sıklon sebepshi bolyp, turaqsyz aýa raıyn ózimen birge alyp keledi degen boljam bar. "Sýyqtyń taǵy bir tolqyny ekinshi onkúndiktiń sońynda bastalyp, aıdyń úshinshi onkúndiginde saqtalady", - dep habarlady "Qazgıdromet" mamandary. Sonymen qatar, vedomstvo ókilderi qańtardyń ekinshi jartysyna jasalǵan boljamnyń sınoptıkalyq jaǵdaılarǵa baılanysty ózgerýi múmkin ekenin eskertti.
