Quramyna Qazaqıa men Qyrǵyzstan, Reseı men Belorýssıa jáne de Armenıa kiretin Eýrazıa ekonomıkalyq odaqtyń qurylǵanyna bir jyl toldy. Osy bir jyldyń ishinde ekonomıkalyq odaqtan qandaı paıda taptyq? Ókinishke oraı, atalǵan odaqtan Qazaq eli zıan shekpese eshqandaı da paıda kórgen joq. Buǵan bir ǵana teńgeniń 85 paıyzǵa qunsyzdanyp ketkeni dálel bola alady.
Ótken jyldyń basynda 5 memlekettiń basshylary Máskeýde kezdesip, ekonomıkalyq odaqtyń jumysyn qortyndylady. Mine sol jıynda memleket basshysy Nursultan Nazarbaev Eýrazıa ekonomıkalyq odaqtyń alǵashqy jylyn qıyn ótkerdik dep málimdedi. Alaıda, soǵan qaramastan prezıdent atalǵan odaqtyń qurylǵanyna oń baǵasyn berip, onyń bolashaǵynan kóp úmit kútetinin jetkizdi.
Qosh, sonymen quramyz dep qulshynǵan ekonomıkalyq odaǵymyz tarıh sanhnasyna shyqty. Alaıda, onyń alǵashqy jyly odaqtas memleketterge aýyr tıgenin prezıdenttiń ózi moıyndap otyr. Sondaı-aq, aldaǵy ýqytta da ekonomıkalyq odaqtan shekemiz shylqymasy anyq. Áıtse de, bizdi paıdadan buryn Reseıdiń Qazaq eline tym jıi tıym salýy alańdatyp otyr. Bul tıym salýlar eknomıkalyq odaqtyń Keńes odaǵynan aıyrmashylyǵynyń shamaly ekenin ańǵartady.
Máselen, jýyrda Reseı prezıdenti V.Pýtın ýkraın taýaryn Qazaq eline tasymaldaýdy retteıtin jarlyqqa qol qoıdy. Bul degen sóz elimizge Ýkraınadan júk tasymaldaý tek Belorýssıa arqyly júzege asyrylatynyn ańǵartady. Atalǵan jarlyqqa sáıkes, taýar tıelgen konteınerler arnaıy sáıkestendirý quraldarymen jabdyqtalyp, júkter túgel plombalanǵan, GLONASS ǵalamdyq navıgasıalyq baqylaý júıesine qosylǵan kólikter arqyly ǵana tasymaldanýy kerek. Bul bir.
Ekinshiden, Reseı aýylsharýashylyq qadaǵalaý komısıasy Qazaq eline AQSH-tan qus etin ákelýge tyıym saldy. Reseılik vedomstvo óz sheshimin, HEB resmı derekteri boıynsha, AQSH-tyń 17 shtaty aýmaǵynda joǵary patogendi qus tumaýyn (N5N1, N5N2 jáne N5N8 kishi tıpteri) 157-den astam juqtyrý oshaǵy tirkelgendigine negizdep otyr. Óıtkeni, AQSH aýylsharýashylyq departamenti deregi boıynsha, joıylǵan jáne ólgen qus sany 33,3 mln basqa jetken jáne kóbeıip keledi.
Jalpy ótken jyldyń basynan bastap Reseı tarapynan Qazaq eline birneshe ret tıym salyndy. Ókinishke qaraı bul tıym salýlarǵa etimiz úırenip bara jatqan tárizdi. Quddy bir ekonmıkalyq shekteýler jasaı berýge Reseı bıligi quqyly sıaqty. Alaıda Qazaq eli óz aldyna bir Táýelsiz memleket emes pe? Endeshe Reseıdiń bizdiń elge jasaıtyn tıymdaryn tez arada tıǵan jón. Áıtpese, Eýrazıalyq ekonomıkalyq odaqtyń Keńes odaǵynan aıyrmashylyǵy bolmaı qalady.
Osy rette odaqtas el retinde Qazaq eli Reseıge tıym sala ala ma degen zańdy suraq týyndaıdy. Óıtkeni, elimiz 1 qańtardan bastap Eýrazıalyq ekonomıkalyq odaq organdaryna tóraǵalyq etedi. Sondaı-aq, memleket basshysy Nursultan Nazarbaev Joǵary Eýrazıa ekonomıkalyq keńesti basqaratyny belgili boldy. Mine, osy tóraǵalyqty paıdalana otyryp prezıdent Reseıdiń áldebir memleketpen saýda-sattyq jasaýyna tıym sala ala ma? Al, Reseı bıligi bolsa ekonomıkalyq odaqtas memleketterge shekteý salýdy ádetke aınaldyryp barady.
Serik JOLDASBAI
Astana
