Ulttyq biryńǵaı testileý bastaldy. Elimizdiń túkpir-túkpirinde qyz-jigitter 11 jyl boıy alǵan bilimderin dáleldeýge kiristi. Bilim mınıstrligi osy jyly tapsyrmalardan maǵynasyz saýaldardy alyp tastadyq deıdi. Memlekettik qupıa sanalatyn synaq suraqtarynyń qorǵalýy da kúsheıgen. Al synnyń alǵashqy kúni oqýshylardyń biraz qýlyǵyn áshkere etti, dep habarlaıdy KTK.

Shymkentte oqýshylar synaqqa kirgizilmes buryn tyńǵylyqty tekserýden ótti. Nátıjesinde, talapkerlerdiń qýlyǵy jappaı áshkerelendi. Sebebi bir bozbala «shpargalkany» ish kıimine, ekinshisi shulyǵyna, al bir qyz tipten beldemshesine tyǵyp ótpek bolǵan. Biraq oǵan jol berilmedi. Al astanalyq túlekterdiń jasyryn test jaýaptaryn ózimen alyp kirýge júrekteri daýalamaǵan sekildi. Ondaı jáıt kezdesken joq. Biraq olarǵa nazar erekshe. Emtıhan aldynda sáttilik tileý úshin Bilim mınıstriniń ózi keldi. «Qolym jeńil» edi dep test saýaldary salynǵan qorapshany da ashyp berdi. «Ata-analaryń dalada tolqyp turǵan sıaqty. Sender olarǵa qaltalaryńda telefondaryń bar ma, mınıstr aıtty úılerine bara bersin deńder. Myna esepterdiń bári durys eken dep. Beske tapsyryńdar!», - dep sáttilik tiledi Bilim jáne ǵylym mınıstri Baqytjan Jumaǵulov. «Aıtqanyńyz kelsin» desken qyz-jigitter qoldaryna tapsyrmalaryn aldy. Saǵat tili týra tańǵy toǵyzdy kórsetkende synaq bastalyp ketti. Ǵımaratta múlgigen tynyshtyq. Aýdıtorıalardyń aldynda jaýapty kezekshiler ǵana júr. Óıtkeni talapkerlerge kedergi keltirýge bolmaıdy. Oqýshylar 125 saýalǵa jaýap berýi tıis. Berilgen ýaqyt shekteýli. 3,5 saǵat. Osy ýaqytta qyz-jigitterdiń «joǵarǵy oqý ornyma túse alam ba» degen ózderin kópten tolǵantqan basty suraǵyna jaýap alýy tıis. Kalkýlátor qoldanýǵa bolmaıdy, qajeti qalamsap qana. Uıaly telefonnyń da paıdasy joq. Óıtkeni aýdıtorıalarǵa baılanysty ajyratatyn qurylǵylar ornatylǵan. Al syrtta qaýmalaǵan ata-ana, aǵaıyn-baýyr. Ul-qyzdarynyń bolashyǵyn oılap alańdaýly. Olar úshin arnaıy monıtor ornatylǵan. Onlaın rejıminde synaqtyń qalaı ótip jatqanyn óz kózimen kórýge múmkindik aldy. Egde jasyna qaramastan seksendegi Anar ájeı de synaq tapsyratyn nemeresimen tańda erip kelipti. Sonyń tileýin tilep júr. «Beretin járdememiz solardyń tilegin tileımiz. Jaqsy ótip ketse eken balalardyń bári kúlip shyqsa eken bireýi de renjimese eken deımiz ǵoı», - dep atap ótti talapkerdiń ájesi Anar Qaljanova. Jedel járdem de kezekshilikte. Abyroı bolǵanda testileý kezinde esinen tanyp, qan qysymy kóterilgen oqýshylar bolǵan joq. Ata-analar úsh jarym saǵatty tapjylmastan kútti, al synaqty alǵashqy bolyp tapsyryp shyqqandardy qoshemetpen qarsy alyp jatty. «Óte qıyn boldy. Ásirese matematıka. Qalǵan pánder ońaılaý», - deıdi talapker Baımuhan Nurdáýlet. Tek bap qana emes, baq ta qatar shabatyn synaq eki aptaǵa sozylady. Joǵarǵy oqý ornyna túsý úshin oqýshylar kemi 60 bal alýy mindet.

Derekkóz: bnews.kz