Tıbet qyzy

Saǵynysh sarqyramasy –
Iyqtan shashyń qulaǵan.
Kózińniń túndeı qarasy, 
Janymnan juldyz suraǵan.

Júrektiń jigi ashyla,
Jylap em qımaı yshqynyp.
Jalmaýyz kempir shashyna,
Gúlim eń ketken qystyryp.

Qymtaǵan máńgi kórpe – qys,
taýyńa kettiń sharshaǵan.
Men bolsam edim erke qus,
Erkindik elin ańsaǵan.

Qushtyń ba menen aýmaǵan,
Gımalaıdaǵy asqardy?
Mahbbat ot bop laýlaǵan,
Jatty ma súıip aspandy?

************

Almatyda sáýir qandaı boz,mamyq,
Shyqqym keldi seni uzaq jolǵa alyp.
Janaryńa tún jabysyp,
Sol túnmen 
men de birge júrgendeımin qozǵalyp.

Almatyda sáýrir solaı,
Jabyǵys.
Ushyp kele salyp óldi kári qus...
Týǵan jerdiń topyraǵanyń nili bar 
Sorady ár tal kirpigińdi saǵynysh!

Oqyrmansyz ǵazalyndaı Qalaýdyń,
Almatyda sáýir solaı naraý.
Muń ...
Ot demińe jazdym aýyzyn kúıdirip 
Júrektegi qan toqtamas jaramnyń...

Búlik-búlik etip jylap jatty qara shyń,
Kórgendeıin ǵasyrdan soń balasyn.
Tóbemizde qalyqtaıdy Qusjoly,
Kókte úzilip qalǵan appaq qanatyń...

Aqsha bultqa aınalǵan aq sharpy

Qyzǵa aınalyp qıalymnyń qusynan, 
Ótip bara jattyń júrek tusymnan .
Saýsaǵyma ilindire almady, 
Samal tartyp aq sharpyńnyń ushynan .

Óttiń qara jigitińdi qasyńa ap, 
Túsinemin, 
Jur ǵoı seni asyrap ...
Kóz jasyńdy zorǵa tosyp kórsetti, 
Shalajansar jatqan jerde japyraq.

Osy kóshe biz sońǵy ret jolyqqan,
Qońyr kúzde jatqan qala bolyp qan .
Ońǵa qaraı burylǵansyń kóshemen, 
Opyrylyp ketkenindeı omyrtqam!

Kúz órtenip tamǵan sol bir tamshydan, 
Kóńilimnen kóshe elesin arshyǵan.
Ushyp shyqty qıalymnyń qustary, 
Aqsha bultqa aınalǵan aq sharpydan ...

Habar bar ma Erkeden ?...

Túnimenen tús bop mıdy órtegen,
Aıtyńdarshy ,habar bar ma Erkeden ?
Hat sandyq dep kókte kúndi silkımin,
Orynymnan atyp turyp ertemen !..

Jerdiń sharyn ketsedaǵy jat kórip,
Meni izdep keleri haq baqqa enip.
Tyrmalaımyn aq qaıyńnyń túpterin ,
Burynǵydaı ketti me dep hat kómip!

Bala – bulaq etbetteıdi byldyrlap,
Qushaǵyna keń dalany sıdyrmaq.
"Úılendi!" – dep shýlaıdy jurt,
Qoıshy ary,
Bala kúndeı oınaǵan-aý "úı jınap"...

Dostar , baıqap oılańdarshy oıdy da,
Almaıdy eshkim erkeligin qoıdyra.
"Aýyr aıaq..." – desedi jurt ,
Shatqaldan 
qaraqatty toltyrǵan-aý qoınyna !

Qasıetin qorǵap qonar tektige,
Adamdardan, álde, azap shekti me?
Perishte bop kókke ushyp Táńirden 
Maǵan óleń suraǵaly ketti me ?..

*******

Aǵa,maǵan túsindirshi dostyqty, 
Japyraǵym boz boranǵa bosqa ushty . 
Jer betine shyǵyp jatqan jotasy, 
Jol degenim óli aıdahar bop shyqty...

Aq paraǵym erip keter qar eken , 
İz qaldyryp ózimdi -ózim máz etem . 
Qyp-qyzyl gúl  ósimdiktiń murynyna 
Qatyp qalǵan mezgilderdiń qany eken ...

Qaryzdarmyn deımin mynaý jaryqqa, 
Jatyr tóler qara altynym tabytta. 
Men betimdi salyp turmyn kúldirip 
Aýadaǵy qalyp qalǵan qalypqa...

Men bilmeımin baqyttyń ne ekenin, 
Bultpyn baǵyt etken jeldiń jetegin. 
Adam bitken súıisip júr amalsyz, 
Birin-biri jamaǵansoń eki erin...

Baǵamdarym ǵalamnan bul baıqaǵan, 
beısharadaı sen de basty sháıqaman. 
Men senetin ólim de onda aldamshy, 
Ómirge adam keler bolsa qaıtadan...

Aıyrylysý azaby

Qanjyǵama jyr – sýsyn baılap júrip, 
Tapqanda seni adasyp aılap júrip,
Sum ómir tek qana óli deneńdi alyp , 
Tastapty qultemirge aınaldyryp !

Sup-sýyq bop ketipti jyly júziń, 
Umytam men de, 
Emespin quly qyzdyń! 
Kózimnen jas aqpady, 
Jylamadym, 
Tútini ǵoı ashytqan shylymymnyń...

Nelikten sonshalyqty qysylamyn, 
Urǵandaı álde júrek tusynan kim? 
Saýsaqta áli sen bergen júzigi bar, 
Qolymdy endi nesin usynamyn?!.

Qonyp bir ýly shópke , 
Ne der edim , 
Ýlanyp qalǵansyń ba ,kóbelegim ?! 
Kózińnen jalǵyz tamshy jas tamsa ,eger, 
Sony izdep qara jerge ener edim !!

Túsken bir jer betine syzat dep men, 
Jolyńa kóp qaradym uzap ketken. 
Qudaı -aý, 
Qaısy bir qol úzip ketti, 
Jalǵyz tal gúldi mynaý tozaqta ósken?!

Keýdemdi órtep jatyr ókinish-muń, 
Ernimdi malyp kúnniń otyn ishtim. 
Qurǵyr -aı, 
Sirá kimder qyrqyp ketti, 
Qaýyrsynyn dúnıe – totyqustyń?!

Kúnder óter , 
Aı óter , 
Jyl aınalyp , 
Bolǵanyn bile almaspyn bulaı naǵyp . 
Jyndydaı , 
Júregimde elesiń qap , 
Shól dalada men júrmin shyr aınalyp !!!.

Qalaý SÁLEMETBAIULY