ءبىز وسى كۇندە جاستاردىڭ كوپ ارەكەتىن «قازاق مەنتاليتەتىنە جات» دەپ سوگىپ جاتامىز. ويتكەنى قىلىقتى قىزدارىمىز بەن قايسار ۇلدارىمىزدىڭ سانى كۇن سايىن ازايىپ بارا جاتقانداي كورىنەدى. اباي اتام "جاس بالا انادان تۋعاندا ەكى ءتۇرلى مىنەزبەن تۋادى. بىرەۋى جان قۇمارى، بىرەۋى ءتان قۇمارى" دەپ بەكەر ايتپاعان سياقتى. 3 جاستان ۇيالى تەلەفوندى جاستانىپ جاتاتىن ۇرپاق نەگە قۇمارتادى؟
ءيا، ءبىزدىڭ جاس بۋىن پايداسىنان زيانى باسىم، ۋاقىتىڭدى بوس وتكىزەر كەرى تارتپا نارسەلەرگە اۋەس. «بۋكمەكەرلىك كەڭسە»، «كومپيۋتەرلىك كلۋب»، «تۇنگى كلۋب»، «اۆتومات ويىندارى» اتاۋلارى قايدا كوز تاستاساڭ الدىڭنان كۇلىمدەپ شىعا كەلەدى. ارينە، بۇل جاسوسپىرىمدەرگە تاپتىرماس نىساندار. قۇمار ويىننىڭ جەتەگىنە ەرىپ، جەتەسىزدىككە بوي الدىرعانداردىڭ سانى كۇن سايىن كوبەيۋ ۇستىندە. ويىنحانا بىرەۋلەردىڭ قالتاسىن قالىنداتسا، بىرەۋلەردى مۇلدەم كوك تيىنسىز قالدىرىپ جاتىر. قۇمار ويىن بيزنەسىنە مەملەكەتتىك سالىق ايلىق كورسەتكىشپەن 30-دان 830 ەسە مولشەرىن قۇرايتىن كورىنەدى. بيۋدجەتتى دە قارجىلاردىرىپ وتىرعانى اقيقات. ويىنحانا قازاقستاننىڭ 2 ايماعىندا عانا رەسمي تۇردە جۇمىس اتقارۋعا رۇقسات بەرىلگەن بولاتىن. ولار: كوكشەتاۋ مەن الماتىدان 70 شاقىرىمداعى قاپشاعاي قالاسى. كازينولار قاپشاعايدىڭ ءسانىن كەلتىرىپ قانا قويماي، حالىقتى جۇمىسپەن دە قامتاماسىز ەتىپ وتىر. بالالىق شاعىمدا «ۇلكەندەر نەگە ءبىز سياقتى جۇگىرمەيدى ەكەن، نەگە وينامايدى ەكەن»،- دەگەن وي اركىمنىڭ دە باسىندا بولعان شىعار. سويتسەك، ۇلكەندەردىڭ وزدەرىنىڭ دە وينايتىن جەرلەرى بار ەكەن. ول ويىندا ۇلكەن قۇمارلىق، ءبىر كىرسە شىعا المايتىنداي، بويىندى باۋراپ الار قاسيەتتەر جاتىر. بۇل تەك سىرتقى ءپىشىنى عانا، ال ءبىز بىلمەيتىن قانشاما جاسىرىن جايتتار جاتىر مۇندا. حالىقتىڭ قاراجاتىن جىمقىرعانداردىڭ دا باراتىن ورىندارى وسى.
قاپشاعاي قالاسىندا العاشقى كازينولاردىڭ ءبىرى بولىپ اشىلعان فلامينگو ويىنحاناسى. ءدال وسى ويىنحانانىڭ الدىندا ساكەن سەيفۋليننىڭ ەسكەرتكىشى ورنالاسقان. قۇداي-اۋ، بۇل نە سۇمدىق دەرسىز... ءبىزدى قويشى، سىرت كوز نە دەيدى؟ قازاققا قال-قادەرىنشە قىزمەت ەتكەن ساكەن سەيفۋللين سىندى تۇلعانى مىناداي جەردەن كورگەندەر اتاقتى "قۇمار پاتشاسى" ما دەپ ويلاپ قالۋى ابدەن مۇمكىن عوي.
اللاھ: «ءاي مۇمىندەر! اراق، قۇمار، تىگىلگەن تاستار (بۇتتار) جانە بال اشاتىن وقتار لاس، شايتاننىڭ ىستەرىنەن ساقتانىڭدار» (ءمايدا، 90) دەگەن. شاكارىم قۇدايبەردى ۇلى:
«قۇمارلىق دەگەن ءبىر يت بار،
جانىڭا جاۋ شىن يت بار.
الدى-ارتىڭا قاراتپاس،
راحىمى جوق تىم يت بار»، - دەگەندەي قۇمارلىقتىڭ قۇشاعىن كەڭگە جايعان وسىنداي وردالارعا باس سۇعار جانداردىڭ سانى ازايا تۇسسە بولار ەدى.
ماۋلەن انەربايەۆ
