قازاقستاندا جولاۋشى تاسىمالدايتىن - 53، جۇك تاسيتىن 10 اۋە كومپانياسى تىركەلگەن. قازاقستان اۋە كومپانيالارى باسپا ءسوز قىزمەتىنىڭ حابارلاۋىنشا، اۋە جەلىلەرىنىڭ كوبى ۋكرايناعا ۇشاتىن تۇراقتى جانە چارتەرلىك رەيستەرىنىڭ سانىن ازايتقان. قازاقستاننىڭ «ەير استانا» جەتەكشى اۋە كومپانياسى استانادان كييەۆكە  دۇيسەنبى جانە سەنبى كۇندەرى ۇشاتىن؛ الماتىدان دۇيسەنبى، بەيسەنبى كۇندەرى ۇشاتىن رەيستەرىن قىسقارتقان. كومپانيانىڭ باسپا ءسوز قىزمەتىنىڭ ازاتتىق تىلشىسىنە ايتۋىنشا، ۋكرايناداعى ساياسي داعدارىسقا بايلانىستى بۇل رەيستەردىڭ جولاۋشىسى ازايىپ كەتكەن. Skat Airlines كومپانياسى ۋكرايناعا رەيستەرىن مۇلدە جاپقان. اۋە كومپانياسى باسپا ءسوز قىزمەتىنىڭ ازاتتىق تىلشىسىنە حابارلاۋىنشا، كومپانيا ناۋرىزدىڭ 1-ىنەن 30-ىنا دەيىن بيلەت العان جولاۋشىلاردىڭ اقشاسىن قايتارىپ بەرگەن. «ۋكراينا حالىقارالىق اۋە جەلىلەرى» كومپانياسى دا كەيبىر رەيستەرىن توقتاتىپ وتىر. كومپانيانىڭ قازاقستانداعى وكىلدەرىنىڭ ايتۋىنشا، بۇعان سۇرانىستىڭ ازايۋى سەبەپ. كومپانيا وكىلدەرى «اۋە قوزعالىسى شەكتەلۋىنە بايلانىستى سيمفەروپول اۋەجايى «ۋكراينا حالىقارالىق اۋە جەلىلەرى» رەيستەرىن قابىلداپ، قىزمەت كورسەتە المايدى» دەيدى. اقپاننىڭ اياعىندا «ۋكراينا حالىقارالىق اۋە جەلىلەرى» كومپانياسى ەلدەگى ساياسي داعدارىس كەسىرىنەن جولاۋشى جانە جۇك تاسىمالى ازايعانىن مالىمدەگەن ەدى. ىسكەرلىك جانە تۋريستىك ساپارلارعا سۇرانىستىڭ ازايۋى اقپان، ناۋرىز ايلارىندا ۋكرايناعا ۇشاتىن رەيستەرگە الدىن الا بيلەتكە تاپسىرىس بەرۋ دەڭگەيىنە دە اسەر ەتتى. وسى سەبەپتى اۋە كومپانياسى رەيستەر باعدارلاماسىن وڭتايلاندىرىپ، اقپاننىڭ 24-ىنەن ناۋرىزدىڭ 29-ىنا دەيىنگى ۇشۋ كەستەسىنەن بىرنەشە رەيستى الىپ تاستاۋعا ءماجبۇر بولعان. ازاتتىق راديوسى