اقىلدى ادام ءوزىنىڭ قاتەسىنەن ەمەس، وزگەنىڭ تاجىريبەسىنەن ساباق الادى دەگەن ءسوز بار. سول سياقتى ءبىز دە ۋكرايناداعى جاعدايدان وي ءتۇيۋىمىز قاجەت. فاشيستىك پۋتين رەجيمىنىڭ قىرىمدى تاۋەلسىز مەملەكەتتەن تارتىپ الۋى - بارلىق حالىقارالىق كەلىسىمدەردىڭ جويىلعانىن كورسەتەدى. ءبىر سوزبەن ايتقاندا، بۇگىن قول قويادى، ەرتەڭ ءوز قولىنان باس تارتادى. قازاقستانعا دا شابۋىلدار جاسالمايدى، اسكەري وپەراسيا بولمايدى دەگەن نارسەلەر ايتىلدى، ءبىراق، ءقازىر كورىپ وتىرعانىمىزداي، مۇنىڭ ءبارى - بوس ءسوز. دەمەك، ەلدىگىمىزدى، ۇلتتىعىمىزدى، مەملەكەت تاۋەلسىزدىگى مەن تۇتاستىعىن ساقتايمىز دەسەك، تەك وز-وزىمىزگە، اقىلىمىزعا، ايلاكەرلىگىمىزگە سەنۋىمىز عانا قالدى. اقش-تا، ەركەك پەن ەركەكتىڭ ماحابباتىن دارىپتەپ، كوگىلدىرلەردىڭ ارتىن قورعاپ جۇرگەن ەۋروپا دا، ءوزىمىز ميف رەتىندە ويلاپ تاپقان تۇركى ەلدەرىنىڭ قاۋىمداستىعى دا قازاقتى قورعامايدى. قورعايدى دەسەڭىز، ونىڭ ءبارى بوس ءسوز. ءوز باسىم امەريكاندىقتاردىڭ نە فرانسۋزداردىڭ اسكەرى كەلىپ، ءبىزدى قورعاپ جۇرگەنىن كوزىمە ەلەستەتە المايمىن.  اسكەري وپەراسياعا اقشا شاشىپ، ومىرلەرىن قيۋعا ولار بارمايدى. تۇركيا دا، ءتىپتى قاسىمىزداعى وزبەك تە سولاي. سوندىقتان، بۇگىنگى ساياسات تۇلكى بولسا، ءبىز تازى بولىپ شالۋىمىز كەرەك. ەندى ءبىز نە ىستەۋىمىز كەرەك؟ ۇناسا دا، ۇناماسا دا ايتايىن، رەسەيدەن بىتىسپەس جاۋ جاساپ، سونىمەن ۇستاسامىز، اسكەرىمىزدى سالامىز دەپ، قۇر تىراشتانبايىق. ۋكراينادان  قىرىمدى 3 اپتادا ءبولىپ السا ، بىزگە ولاردىڭ 1 اپتاسى عانا كەتەدى. بىزدەگى ورىستاردىڭ ۇلەسى 24 پايىز ەكەنىن ەسكەرسەك جانە ولاردىڭ شوۆنيستىك امبيسياسىن قوسساق، ىشىمىزدەن اق رەسەي كۇل تالقانىمىزدى شىعارادى. سوندىقتان، مەنىڭشە، ەڭ ءبىرىنشى كەزەكتە مىناداي شارۋالاردى ويلاۋىمىز كەرەك:

1. قازاقتىڭ سانىن كوبەيتۋ (پالەستينا ليدەرى ياسير ارافاتتىڭ ءسوزى بار: "ءبىزدى قۇتقاراتىن تەك قانا اراب ايەلىنىڭ جاتىرى" دەگەن. سول سياقتى، قازاقتىڭ سانى قالاي كوبەيەدى، وعان قانداي جاعدايلار كەرەك، نە ىستەيمىز بۇل باعىتتا دەگەن ساياساتتى ويلاۋىمىز قاجەت). 2. قازىرگى جاعدايدا رەسەيمەن دە، باسقا دا الپاۋىت ەلدەرمەن دە اشىق كونفرونتاسياعا بارماي، مۇمكىندىگىنشە مەملەكەتتىك تاۋەلسىزدىگىمىز بەن تۇتاستىعىمىزدى ساقتاپ قالىۋىمىز كەرەك. پۋتين - ماڭگىلىك ەمەس، رەسەيدىڭ ءبىرىنشى يمپەرياليست، قانىشەر ءارى جاۋىز پاتشاسى ەمەس، تالايى بولدى، بارلىعى دا جاھاننامعا، توزاققا كەتتى. بۇل دا كەتەدى. ءبارىبىر بىرتە بىرتە ونىڭ ورنىنا ازداعان ليبەرالدىق كوزقاراسى بار، جۇمساقتاۋ باسشى كەلەدى. ال، ونداي بيلىك ەۋروپامەن جاقىنداسۋعا، بىرلەسۋگە ات سالىساتىنى تۇسىنىكتى. ەندى ءومىر بويى باتىسپەن جاۋ بولىپ، قىرعي قاباق بولىپ وتىرمايدى عوي! 3. سولتۇستىك وبلىستارداعى قازاقتاردىڭ سانىن كوبەيتۋ قاجەت. جۇمىس ورىندارىن اشۋ، ءۇي بەرۋ، پەرسپەكتيۆا بار دەگەن نارسەنى قۇلاققا سىڭىرسەك، ول جاققا جۇمىسسىز جۇرگەن مىڭداعان قازاقتىڭ وتباسىلارىن اپارساق، ەرتەڭ "بولىنەمىز!" دەگەن ورىستى توبەسىنەن قويىپ، ورنىنا وتىرعىزاتىنداي جاعدايدا بولادى. ال اشىق اسكەري قاقتىعىسقا رەسەي بارا قويماس. بۇدان باسقا دا اۋقىمدى ساياسي ءىس-شارالار جۇرگىزىلۋى ءتيىس، ارينە. ءبىراق، ەڭ نەگىزگىلەرى وسى دەپ ويلايمىن. ال مۇنىڭ بارلىعىن جۇزەگە اسىرىپ، مەملەكەتتىگىمىزدى ساقتاعىمىز كەلسە، بەلسەندىلىكتى ارتتىرىپ، ۇلتشىلداردىڭ ينتەللەكتۋالدىق دەڭگەيى قۇر ايعاي ەمەس، ۇلكەن دارەجەدە ەكەنىن كورسەتىپ، ءبىزدى بيلىك تىڭداماي قويمايتىنداي كۇيگە جەتۋىمىز ءتيىس. وسىنداي ويلار، الداعى انتيەۋرازيالىق فورۋمدى دا، ودان وزگە دە شارالاردى دا ۇلكەن ينتەللەكتۋالدىق دەڭگەيدە وتكىزسەك دەگەن نيەتكە جەتەلەيدى.

جانبولات ماماي