بۇگىن، دۇيسەنبى، 24 ناۋرىز كۇنى وسى ايدىڭ باسىندا (8 ناۋرىزدا) Malaysia Airlines اۋەكومپانياسىنا تيەسىلى Boeing-777 ۇشاعىنىڭ ءىز-تۇسسىز جوعالىپ كەتۋ سەبەبى انىقتالىپ، رەسمي تۇردە حابارلاندى. مالىمدەمەدەن بەلگىلى بولعانداي، اۋەكەمەسىن ەشكىم ەشقايدا ۇرلاپ اكەتپەگەن. Malaysia Airlines اۋەكومپانياسى تاراتقان حابار بويىنشا، ۇشاق ءۇندى مۇحيتىنىڭ وڭتۇستىك ايماعىنا قۇلاپ تۇسكەن.

كەيىن بۇل حاباردى ەل پرەمەر-مينيسترى نادجيب رازاك تا راستادى. ودان بولەك، ول بۇل سۋىت حاباردى جولاۋشىلاردىڭ تۋعان-تۋىستارىنا جەتكىزگەنىن دە حابارلادى:

«ءبىز بۇل جاعدايدىڭ ءدال وسىلاي قايعىلى اياقتالعانىنا ۇلكەن وكىنىش بىلدىرەمىز. ۇشاقتىڭ اپاتقا ۇشىراپ، مۇحيت ايدىنىنا قۇلاعانىنا ەش كۇمان جوق. ءبىز ۇشاقتىڭ شىندىعىندا دا ءۇندى مۇحيتىنا قۇلاعان فاكتىسىن مويىنداۋىمىز كەرەك»،-دەپ مالىمدەدى نادجيب رازاك.

Reuters اگەنتتىگى حابارلاعانداي،  الدىن-الا بولجامدار بويىنشا، Boeing بورتىندا بولعان ادامداردىڭ بىردە-بىرەۋى امان قالماعان.

قازىرگى كەزدە تەرگەۋشىلەر Boeing-777 كەمەسىن باسقارعان پيلوتتاردىڭ ءومىربايانى مەن جۇمىس ورنىنداعى بارلىق فاكتىلەردى مۇقيات تەكسەرۋدە. وسىعان بايلانىستى وسىدان بىرنەشە ۋاقىت بۇرىن ۇشاقتاعى ەكىنشى پيلوت فاريك ابدۋل حاميد جونىندە قىزىقتى اقپارات تاراعان ەدى. ول بويىنشا، ابدۋل حاميد Boeing-777 ۇشاعىنىڭ تىزگىنىن وسىمەن تەك بەسىنشى مارتە ۇستاعان كورىنەدى. ال 8 ناۋرىز كۇنى ول تۇڭعىش رەت تولىققاندى ەكيپاج مۇشەسى رەتىندە، ياعني ينسپەكتوردىڭ قاداعالاۋىنسىز ۇشقان.

الايدا Malaysia Airlines اۋەكومپانياسى بۇل جاعدايدىڭ بولعان وقيعاعا ەش قاتىسى جوق دەگەندى ايتادى: بۇل كوپشىلىك كومپانيادا بولاتىن پيلوتتار اراسىنداعى تاجىريبە جۇمىسى. ونىڭ ۇستىنە، وسىعان دەيىن باسشىلىق پەن ينسپەكتورلاردىڭ ابدۋل حاميدكە بىردە-بىر شاعىمى نە ەسكەرتۋى بولماعان ەكەن.

سونداي-اق بۇگىن ىزدەستىرۋ جۇمىسىمەن اينالىسىپ جاتقان توپقا قوسىلعان اۋستراليا ەلىنىڭ ءبىر كەمەسى كەشە جۇڭگو جەر سەرىگى عارىشتان ءتۇسىرىپ العان ايماققا (قىتايلىق جەر سەرىگى ءۇندى مۇحيتى بەتىنەن اپاتقا ۇشىراعان ۇشاققا تيەسىلى بولشەكتەردى تاۋىپ العان) اتتانىپ كەتتى.

ەستەرىڭىزگە سالار بولساق، Malaysia Airlines اۋەكومپانياسىنا تيەسىلى ۇشاق 8 ناۋرىزعا قاراعان ءتۇنى وڭتۇستىك جۇڭگو تەڭىزى ۇستىندە ۇشاپ بارا جاتقان جەرىنەن راداردان عايىپ بولعان. Boeing-777 اۋەكەمەسى كۋالا-لۋمپۋر – پەكين مارشرۋتى بويىنشا كەزەكتى رەيسىنە اتتانعان ەدى. ونىڭ بورتىندا بارلىعى 227 جولاۋشى مەن 12 ەكيپاج مۇشەسى بولعان. لاينەردەگى جولاۋشىلار اراسىندا ءبىر رەسەي، ەكى ۋكراينا جانە 150-دەن استام جۇڭگو ازاماتتارىنىڭ بولعاندىعى بەلگىلى بولىپ وتىر.

بولات قوسماعامبەت

دەرەككوز: ماسساگەت