ۇكىمەت جانىنداعى جەر كوميسسياسىنىڭ مۇشەسى جانۇزاق اكىم كوميسسيا جۇمىسىن اقپارات قۇرالدارىندا كورسەتۋدەگى كەمشىلىكتەردى ايتتى، - دەپ حابارلايدى Qamshy.kz.

«مىنا جۇمىسىمىزدى اقپارات قۇرالدارى ءبىر جاقتى تۇسىندىرۋدە. ەل «حابار» ارناسىن كورۋدەن شارشادى. ءقازىر ولار «بىزدە بارلىعى تاماشا، ءومىرىمىز كەرەمەت!» دەگەن سياقتى حابارلار تاراتادى. وسىندا 70 ادام وتىرسا، سولاردىڭ بارلىعىنىڭ ايتقاندارى كورسەتىلۋى كەرەك»، - دەيدى ج. اكىم. وسى ورايدا، كوميسسيا مۇشەسى جەر داۋىنا قاتىستى ارانداتۋشىلىق سيپاتتاعى اقپاراتتار تاراتىپ وتىرعان «ەۋرازيا» ارناسىنىڭ جۇمىسىنا دا بيلىك ورگاندارىنىڭ نازارىن اۋدارتتى.

كوميسسيا مۇشەسى سونداي-اق، كوميسسياداعىلاردىڭ وڭىرلەرگە ساپارىن ۇيىمداستىرۋعا قاتىستى دا ۇسىنىسىن ايتتى.

«بىزگە دەيىن پارلامەنت دەپۋتاتتارى دا باردى عوي وڭىرلەرگە. ولار نە قاتىردى؟ بارىپ كۇلكى بولىپ قايتتى. اكىمدىككە بارىپ، اكىم شاقىرعان ادامداردىڭ الدىندا سويلەۋدىڭ تۇك قاجەتى جوق. ءبىز، كوميسسيا مۇشەلەرى اكىمدىك شاقىرعان ادامدارمەن ەمەس، جالپى حالىقپەن جۇزدەسۋدىڭ جولىن ىزدەۋىمىز كەرەك»، - دەيدى ول.

ج. اكىم مىرزا، سونىمەن قاتار، قازاقستانداعى قالا تۇرعىندارىنا 10 سوتىق، اۋىل تۇرعىندارىنا 20 سوتىق تۇرعىن ءۇي سالاتىن جەرلەردىڭ ءالى كۇنگە بەرىلمەي كەلە جاتقانىن ايتىپ، وسى ماسەلەنى جاقىن ارادا شەشسەك، بۇل ناعىز ناقتى قادام بولار ەدى دەگەندى ايتادى.

سونداي-اق، كوميسسيا مۇشەسى نارازىلاردى قۋدالاۋ مەن ولارعا تاعىلعان ايىپتاردىڭ دا ەلدىڭ مازاعىنا اينالعانىن اتاپ ءوتتى. ءسوزىنىڭ سوڭىندا ج. اكىم وسىعان دەيىن جەر ساتۋ، جالعا بەرۋگە قاتىستى ماسەلەلەردىڭ انىق-قانىعىنا كوز جەتكىزۋ ءۇشىن كوميسسيا جۇمىسىنا ۇكىمەت باسشىسى مەن قاۋىپسىزدىك كەڭەسىنىڭ حاتشىسى كەلىپ، تۇسىنىك بەرۋىن تالاپ ەتتى.