مەكتەپ فورماسى تۋرالى اڭگىمە ءبىر بۇگىن قوزعالىپ وتىرعان جوق. ءبىرىڭعاي مەكتەپ كيىمىنىڭ ۇلگىسىن بەكىتۋ، مەكتەپ وقۋشىلارىنىڭ باسىنا ورامال تاعۋى سىندى پىكىر-تالاستار بۇعان دەيىن دە بولدى. ءالى دە تالاي داۋ بولاتىن سياقتى.

نەگىزى مەكتەپ فورماسىن تاڭداۋ اتا-انالاردىڭ ەركىندە. ءار مەكتەپتە اتا-انالار جيىنىندا بەكىتىلەدى ورتاق كيىم ۇلگىسى. دەمەك، بۇل ماسەلەدەگى كەلەڭسىزدىتەرگە بايلانىستى مەملەكەتتى، زاڭنامالاردى كىنالاۋدىڭ ءجونى جوق. ماسەلە ءوزىمىزدىڭ كەڭەستىك ويلاۋ جۇيەسىنەن الىستاي الماي وتىرعان سانامىزدا.

مىنە، بىرنەشە كۇن بۇرىن مەكتەپتەردە سوڭعى قوڭىراۋ سوعىلدى. مىڭداعان تۇلەك مەكتەپتى ءتامامداپ، ۇلكەن ومىرگە اياق باستى. ەندى سول مەكتەپ بىتىرۋشىلەردىڭ سوڭعى قوڭىراۋ شاراسىنا كيگەن كيىمدەرىن قاراڭىزشى. كەڭەستىك اق فارتۋك، قىسقا يۋبكا، تاعىسىن تاعىلار. كەڭەس وداعىنىڭ قۇلاعانىنا 25 جىل وتسە دە، سول كيىمدى مامىر ايىنىڭ سوڭىندا الاسۇرىپ ىزدەپ كەتەمىز. بازاردان تاپپاساق، ارنايى تىكتىرەمىز. ءتىپتى، ونداي كيىم كيمەسەڭ سوڭعى قوڭىراۋعا كەلمەيسىڭ دەگەن رەسمي تالاپ بولماسا دا، ءوزىمىزدى ءوزىمىز اۋرەلەيمىز.

تاۋەلسىز مەملەكەت رەتىندە كەڭەستىك ءبىلىم جۇيەسىنىڭ قالدىقتارىنان ارىلۋ جايى ءوز الدىنا، ول كيىمدەردىڭ تاربيەلىك، ەتيكالىق قىرلارىنا دا نازار اۋدارۋ كەرەك. فەيسبۋك جەلىسىندە ايدا جەكسەن ەسىمدى قولدانۋشى وسىنداي وي تاستاپ وتىر.

«كسرو كەلمەسكە كەتكەلى شيرەك عاسىر ءوتتى. ال، كەڭەستىك شەرۋلىك كيىم ۇلگىسى ءالى ءتىرى. نە ماسقارا؟ سول بانتيك، گولفي مەن قىسقا كويلەكتە قانداي ءسان بار؟ كەۋدە تۇسى تولىسقان ۇلكەن قىزداردىڭ ونداي كويلەك كيۋى قالاي بولادى؟ ونداي قىزداردى پەدوفيلدىڭ ارمانى دەرسىڭ!»، - دەگەن ول تاۋەلسىز قازاقستاننىڭ كەڭەستىك ۇلگىدەن ارىلۋ كەرەكتىگىن، «قازاقستاننىڭ كسرو دا، رەسەي دە ەمەستىگىن» ايتادى.

ايدانىڭ بۇل ايتقاندارىن الەۋمەتتىك جەلىدە قولداعاندار دا، «تاريحتى بۇرمالامايىق» دەگەن جەلەۋمەن قارسى شىققاندار دا كوپ. قالاي بولعاندا دا 17-18 جاستاعى قىزداردى مەكتەپ تابالدىرىعىنان وسىنداي اشىق-شاشىق كيىمەن شىعارىپ سالعانىمىز دۇرىس ەمەس سياقتى. سوندىقتان دا، اتا-انالاردىڭ وسى ماسەلەدە ۇلتتىق ۇستانىمداردان الشاقتاماعانى دۇرىس.